ترى الرجل في هالزمن لازم يحسب له حساب = أما بيغلب هالزمن وإلا الزمان بيغلبه
لك حق والله يازمن لاشنابنا محـدٍ يهاب = دام الصغير بوقتنا قام يتفاخر بشنبه
لا يازمن في هالزمن كل ٍ يبي نفسه عقاب = يظن ذكره صار نار وتو مالم ّ حطبه
صار الردي في وقتنا يكسب من علومه اعجاب = مقيول والله يازمن من دور الطيب كسبه
كم واحد ٍ صار الطموح بداخله مثل السراب = دامه يشوف بوجه بابه وين مالد ّ عتبه
بعض الرجال بهالزمن مايوسع أفكاره كتاب = وبعض الرجال من الجهل ماكل شي ٍ يعجبه
كم شايب ٍ فكره صغير وتلمح بوجهه شباب = وكم من شباب ٍ ذل وقته هالزمان ..وشيبه
لايازمن لو صرت ضدي ماابي منك ثواب = أزعل ترى مثل الطفل لو ماينفذ مطلبه
حتى الكذوب ليا غدا هرجه مثل وبل السحاب = ماكل اذن ٍ يازمن تصغي عليه وتشربه
قل لبن آدم يازمن وجهك مرده للتراب = يوم الحساب بوقتها ماينفعك قـولة : يبه
قل يازمن منهو سألك ولالقى منك جواب = غير الغريب اللي يخون بسلم ربعه وعربه