/
/
/
صعب لامنك فشلـت وصعـب لامنـك لقيـت
إن من يكره نجاحك يـدري انـك مـا نجحـت
امس ضقت ورحت اقلـب ذكرياتـي وانتهيـت
عند صورة طفل صوته مثل صوتي لا انجرحت
وش مثل ؟؟ لا والله إلا هذا أنـا يـوم ابتديـت
انطق حروفٍ تلعثـم فـي لسانـي لا انمدحـت
هذا أنا يوم الحيـاه فـنظرتـي عشريـن بيـت
ومسجدين ومدرسه من طين كم فيها اصطبحـت
هذا أنا .. وأصبحت أتمتم .. (هذا أنا) حتى بغيت
اختنق بس القدر عيّـا علـى موتـي وطحـت
وصاح صوت الطفل فيني انت من وين ارتميت
قلت أنا المستقبل اللي فيه كم همـت وطمحـت
امس كنت أبيك تكبـر بـس والله لـو دريـت
اني اللي عشت لجله مـت عنـدك واسترحـت
لو دريت إن الزمان يجـر رجلـي مـا عديـت
ولو دريت إن البحور بلا موانـي مـا سبحـت
كان دربك لي طويـل وكـل ماشفتـك هويـت
قلت لك كبوة جواد ومـا كبيـت إلا وجمحـت
ليـه تسمعنـي وتمشـي آه ليتـك مامشـيـت
وآه ليتك من كثـر عثـرات الأيـام انتصحـت
ضاعت احلامي وضل الحزن فينـي واهتديـت
للطريق اللي يودينـي علـى دمعـي ورحـت
يالحزن ليتـك مثـل دمعـي وتنـزل لارقيـت
بس أعرفك لو مسحت الدمع تبقى ما انمسحـت
كان حلمي في وجـود إنسـان يبكـي لابكيـت
وصار حلمي في وجود إنسان يفـرح لافرحـت
كنت اشوف الناس مثلي كل ما جعت وضميـت
ما دريت إن الاوادم ناس فـوق ونـاس تحـت
آآآه يا أول ذكرياتي خذنـي فـحضنـك نسيـت
لأسألك عن وجه ابوي اللي معه يامـا سرحـت
خذني فـحضنك ابغفى .. ياااااه مبطي ماغفيت
وان لمحت دموع عيني سو نفسك مـا لمحـت
خذني فـحضنك وبعثر في جروحي وان قضيت
هزلي كتفي وقلي : عيب تبكـي لـو سمحـت
اضحك وعلم زماني من أنا .. ومن وين جيـت
طق باب الحزن واصرخ فـيّ لامنـي فتحـت
وضمني يمك .. وكمل ضحكتك لامـن بكيـت
ودي اذكر كيف كانت ضحكتي لامـن فرحـت
/
/
/
فهد المساعد
/
،،