سلام يادوحة قطر والنظـر فـوق
وانا وراء حد النظـر وانظرينـي
جيتك وانا اشيل الغلا طاق مطبوق
ليتـك تحسيـن بغـلاك وتجينـي
ماأقولك جيتك من الشوق محروق
ولااقولك زيدي غـلا واحرقينـي
جيت اتعلم منك وش يعني الشوق
لاجيت احطك بين قلبـي وعينـي
غرنوق يادوحه يالبيـه غرنـوق
وأنا مع الغرنـوق بايـح كنينـي
لايابعـد ديـرة معمـر وفـاروق
ولحود وحسين وعلى والخمينـي
اقولها واقول لو كنـت مسبـوق
يكفينـي انـك ياقطـر تسمعينـي
مدامها مابين عاشـق ومعشـوق
عاشق ولكـن طالبـك تعشقينـي
اسولف بعشقك على كل مخلـوق
ولا لامني كود الـردى والدوينـي