اليكم اخواني هذه القصيده للشاعر الكبير\ مطلق النومسي وهي تعتبر من اجمل قصائده من وجهة نظري
يالله يامن كلنا له مطيعين = يجازي نفوس العباد بعملها
رحماك ياربي وحنا ضعيفين = نطرد هوى نفسٍ على الذنب ولها
قلوبنا زينه ودرب الخطا شين = وعيونا دمع الخطايا كحلها
جينا نبي رحمتك يحافظ الدين = جيناك ندفن روسنا من خجلها
لنا ثلاث سنين او أربع سنين = نرجي حيا دارٍ تطاول محلها
يالله بغيثٍ يضرب القاع شهرين= على الديار اللي تشرف بــ هلها
تغريب من حايل شمال الشريفين= دارٍ تضم بطيبها من نزلها
يعلها الوسمي من الحين للحين = والنفس عن ضيق الهواجيس دلها
المي ناقع تحت سرب الكراوين = وام الارانب لعبها في دحلها
تلقى الزبيدي مثل روس الصعانين = للارض قابلته ولا هو قبلها
تقطف زبيديه ومن بعد يومين = في نفس مقطفها تعيّن بدلها
والعشب فوق الارض تقريب مترين = متخالطٍ نوارها مع نفلها
يا وجد حالي يالرجال الحشيمين = اللي قليله بالمخاوى زللها
نمشي على سلم الرجال القديمين = من مرته عوجا رفيقه عدلها
ميعادنا بكره على وارد الفين = جيوب شاصٍ ما نحرك دبلها
عيونهن تشبه عيون الشياهين = كن الرياح الذاريات تحملها
وأول ما يطري مع زنين الشكامين = زنة خليات النحل من نحلها
ولينتها المشوار بين الضحاوين = والنفس تدفع في رضاها زعلها
طاح الحطب والنار دخانها زين = ليا تمكن بالعيون يغسلها
وقربلها الرسلان ابو ختم قوسين = في يد شغموم الرجال وبطلها
وتشنكر اولاد السنه بالكرّاعين = شعيرة الفلاح ما تسد اكلها
وليا سكر هب الهوى جاك صوتين = يبرنْ تسبدٍ مرمساتٍ عللها
اللقح والفطر من الخنفه يمين = ويساره الخلفات بالروض تلها
وبكار عاااام العام بين الجهامين = ترعى تحت هيبة وحشمة فــحــلها
يبرى لهن راعي تبعهن من سنين = موالفات لصيحته ليا نتلها
وليا بغى درهامهن هالمليعين = حول عن وروك الرحول وعقلها
وليا ضوان الليل بحساب ليلين = ونفوسنا وسع الفياض وسهلها
ثم إستوى الفنجال بين الصلاتين = وقامت سواليف القصيد بعملها
هذي مناة القلب والروح والعين = قدام نفسي لا توافي اجلها
اخير من قولة حكم صن خمسين = وهذا مشكلها والاخر دبلها
قال ابشر بميه وتردف سراوين = وإن قالها الله غير نلقا حللها
جمع ورق بيلوت زاتين زاتين = وقل للموزع رح دامه شخلها
وعطني هنا ياموزع الزات ثنتين = وشلها اذا تقدر عمى عين شلها
لجه وصجه تقل جمعة مساكين = اكبار سن وزد الله جهلها
وسلامتكم