الله من هم(ن) طواني وانا اطويه= عيا يفارقني وانا ادور ادواه
رجواي بعده واستزاد بتماديه = من وين مالقيت في وجهي القاه
يمتد من اصله جروح(ن) تغذيه =تروي غصونه من بدايات منشاه
نار(ن) توقد في حشاية وانا اطفيه=ويبقى رماده في حشايه وانا اجفاه
وان هاج فيني دايم الدوم صاليه=ولامات فيني منبعه صب واحياه
يشدني من داخلي من طواريه= الصاحب اللي تنعش الروح طرياه
اهرب عن همومي واجي واحتمي فيه=والروح تبحر وفي محبته مرساه
لو اوصفه بالحب ماعاد يكفيه= وقلبي عطاه ومااقنعه كل مااعطاه
حلمي لقاه ومنيتي من امانيه= ودايم معه قلبي مماشيه ممشاه
من غصن حسنه اقطف الحب واجنيه=وقلبي يعزه يعشقه ثم يهواه
مثل القمر لابان بالارض يضويه= ومثل النجوم اللي دليله تقداه
قلبي صفاله ومن صفاله يصافيه=صفصف مصافي الود من عمق مصفاه
ارجيه في وصله لوصلي واوصيه= وقلبه وفي وعلى وفى الخل وصاه
مايخذل اللي بالاحاسيس يرجيه=اطلب من الله من الحواسيد يحماه
واذا ابتعد عني اصونه واوفيه=وابقا على ذكراه مايمكن انساه
ويرد همي ولي تبين مواريه= هم(ن)جرح قلبي من اسفله لاعلاه
خفيه اسبابه وانا اجهل معانيه=معناه يجلب ضيقتي وين معناه
وكلن خذاه الهم والكل يشكيه=تخطه اقلامه وتحكي به اشفاه
ياوين ابا القا لي مراسي بموانيه= وياوين ابا القا من يداويه بدواه