يامليك الشعر شعري ثبته=واحفظ حقوق الطبع الى شخصيتي
العاصفه تبدى بعج هبته=تلعب على برقه طرب جنيتي
ترى البحر غبه وانا في غبته=سباح ماتثني العواصف جيتي
يامحللين القاف عيدوا حسبته=الشك ماعمره طعن في نيتي
من حبني مثله عيوني حبته=واللي كرهني زاهبة له حيتي
منهو يداري بالمراجل شبته=لايقرب حدودي وحظر محميتي
يومه ولد عمي عليه قبته=ما اشيلها لاني اعرف شعبيتي
اصل الردي يبقا ردي لو ضبته=قوم تعز الدار ياعفويتي
ياللي تعلمت الشعر لعلبته=رح طبقه مثل العنود بنيتي
ترى العنب حامض وحلو عنبته=من طالها وافهم على رديتي
الشعر ماهو مرجله ياجبته=المرجله ام الشعر وصيتي
واللي ترك لي بالقفا مسبته=عديتها ولاطعت اهادن سيتي
فنجال سويته وايديه صبته=لا اشرّبه للأمّعه بيديتي
وان ما شربها هالغشيم ابسبته=تكنسل الويلان لي عضويتي
امي ولدها من الصغر لوربته=ابوي درّس بالمراجل تيتي
اتعب على الطيب وادور صحبته=ولا انت كفوك بالمراجل خيتي
استدرك المعنى وفصل لبته=بطنك يسنعها طرف شبريتي
انا قصيدي ما اكل مطبته=وسواقتي تفرض علي حرفيتي
من نسل ابن وايل وعضمي امنبته=ربعي هل العرفا وذي ماريتي
راكان ابن مرشد والا ياهبته=عز الفخر والانتما قوميتي

الأخ الشاعر سلمان الردسا



صـــح فـــكــرك الـــراقــي



وســــلم قلـــبك الــواعــي



تحيه لك على هذا الإبداع