ودي أكتب لي قصيده تسبق عصور الخرافه=قبل نكتب بالاصابع بالهوى وتطلع حروف
قبل مافكرك يفكر تنطقه آلة صرافه=وتترجم الاحساس جمله وانت كنك ماتشوف
وش تسوي مايفيدك حتى قولت واحسافه=كل ماحولك يترجم كلها خوفٍ بخوف
كيف تضحك كيف تاكل كيف تحضر للضيافه=كيف تسأل من يجي لك كيف حاله والظروف
أوووووه ياذاك الزمان تقول يابعد المسافه=كنا نكتب في يدينا كنا ناكل بالكفوف
وكل من حولك يطالع وقال هذا فيه آفه=وآلته تكتب خواطر يقول في عصر الضعوف
وانت مسترسل تسولف كنا نقرا عن الخلافه=في كتب تعب المؤلف حصرها بين الرفوف
وكنا نضحك مع بعضنا وكانت مافيها كلافه=كنا بالمجلس نسولف كنا نعزم للضيوف
إيه كنا وفات كنا والزمن شفنا اختلافه=وين كنا وين صرنا ! الزمن غير معروف
أجهزتنا بالمجالس بعضها والله تعافه=بهذلتنا وازعجتنا والسوالف صارت أووف
لاالمعزب ولا ضيوفه أجهزتهم به لقافه=كل ماتبدى تسولف رن واشر لك شطوف
ياهل العلم المفصل أرسلوا حلٍ بقافه=والله إن الوضع مزري والزمن فينا يطوف