حلمت لي حلم يالشيخ عـمار= من حلمتي له صار بالقلب تأثير
حلم سرى بي تالي الليل لديار = وأصبحت عن الدار في ديرة غير
مع وسط ناس مالهم حتى الأذكار= غابوا عن الديره وجونا مسايير
أحيا أحلام(ن) كاذبه يابن الأخيار= حلم يصور لي هك الوقت تصوير
شفت السلف فاتوا على جيش وإمهار= وشفت الضعون اللي تسوق الغنادير
من غير حروه جونا الأحباب زوار = وعادة هلاهيل الفرح والتباشير
يوم إتقوا طلعت برا عن الدار = نطيت أبرقا عاليات المناقير
وإني بحوش(ن) بين بابين وجدار = لامن عرب حولي ولامن مظاهير
وإفترت المكره على ماض الأدوار = على زمان(ن) يوم أنا شب وصغير
ياماحلا صوت أم سالم بالأقفار = في روض هادي مابجوه معاصير
مستانسين بحسها وقت الأفطار = نسمع وحيها طلعت الصبح وعصير
والديك مانوحيه يلعي ورا الدار = وبالليل مانسمع ضجيج المواطير
ماغير عويت ذيب وحنة حوار = وحس النجور اللي تجيب المسايير
تغيرت وتبدل البيت بجدار = عقب العمد حطوا فوقه مواسير
ولقيت ناس(ن) ماتبي شبت النار = قلت السبب قالوا حضاره وتطوير
حضارت(ن) عمَت على كل الأقطار = بسلم (ن) جديد اليوم وسلمنا غير
وبكرتي تقطعت عنها الأذكار = وأفخت حروة وردها والمصادير
وسألت عنها كل مذهب ودوار = ويأست ماجابوا خبرها المداوير
وليا شلهبت نجد توصلنا للأسعار = لمنبت الحب الحمر وديرة الخير