بعدك عن اللي مايعزك معزه = وصدك عن اللي يعتني بك ردا منك
لاصار في لازمك عجل" مفزه = اكبر خطيه في لزومه تهاونك
واللي يعزك لازم انك تعزه =وتعلن معه طول الليالي تضامنك
والصاحب اللي عشرته بس رزه = مثل العدو اللي قبل ساكت" عنك
لاتجرح شعوره ولاتستفزه = وترا الكلام الشين دايم يشينك
للصمت حزات" وللهرج حزه = ومن لايعرفك معرفه مايثمنك

مهما يجيك من الردا من رفيقك = حاول تغاضى لايجيه الردى منك
ترا رفيقك وان وقف في طريقك = مثل الرصيد ان قل او زاد بالبنك
واعرف عدوك قبل تعرف صديقك = ومن لايحس بضيقتك مادرى عنك
ولا تيد المخطي ولو هو شقيقك = وش عذرك من اللي على ايسرك وايمنك

جنب عن اللي في رخا الوقت خلان = اللي كثير وفي لزومك قليلين
يمكن يسرك فـالميه لابدا الشان = واحد ولاينفعك تسعه وتسعين
خلك عن النمات والسرق منصان = وعن البلااسه واعتراض الرديين
وامنع دخيل البيت في كل الاحيان = لاتنخدم للذل مثل الذليلين
ولاتنصح اللي مابغوا منك نصحان = باشوارهم من دون شورك غنيين

خويك الطيّب عنه لاتبرا = اصبر عليه وخل شينه عجاريف
يشرب معك مشروب حلو" ومرا = ويارد معك حوض المنايا لياعيف
نوب ايتذرابك ونوب اتذرا = خله ذرا" لك عن هبوب الشفاشيف

سر ياقلم مالي على الصبر طاقه= صبري تعدى الحد ماعاد ينطاق
اكتب لمثلي قصته واشتياقه= في خطك الواضح على بيض الاوراق
قصة حزين ٍصافي المر ذاقه= وانا بذكرى مواصله خاطري ضاق
باقو به الاصحاب والوقت باقه= وصار الضحيه بين باير وبواق
يمشي وهو ماحس في كسر ساقه= امسى على ساقين واصبح على ساق
وهذي سواة الوقت شين اصطفاقه= الوقت لو يصفي لك ايام ماراق
لاشك يامن معك عقل ولباقه= بانصحك كان انك للأمثال تشتاق
صادق رجالٍ يعرفون الصداقه= يقفون في صفك يوم يبسات الارياق
ومن يرغب فراقك فعجل فراقه= جاز الذي يبغالك افراق بفراق
يقوله اللى جاير الوقت عاقه= ولازال في غيبوبة الهم مافاق
حظه على اقشر شي للنفس ساقه=بقبور الاحياء ينتظر يوم الاطلاق

كاني لياجيتك تجي جيت يمك =وان كان اجيك ولاتجي تبت ماجيك
ماني باخوك اصغر ضنا ابوك وامك = رجل على ماطالني منك اجازيك

خويك اللي مايقدر مواقفك = ترا ربيع القلب بعده وفرقاه
لاصار لارجل" مقامه يشرفك = ولاطيب" تقدر تحمل خطاياه
منت ولد" له يستهينك ويعسفك = ولا والد" ودك على مكسب رضاه
ابعد عنه في ديرة" مايشاوفك = اخير من قربه وشوفه ولاماه