يالله يليّ كل الأموات ترجيك = يا واحد ما خاب حيّا ترجاك
يارب عبدن مامشى في معاصيك = ولايمشي إلا في محبتك وأرضاك
يا مرقب بالصبح ظليت باديك = ما واحد قلبي خبرته تعلاك
وليت ياذا الدهر ماكثر بلاويك = الله يزودنا السلامة من اتلاك
ياللي على العربان عمت شكاويك= وليت يا دهر الشقا ول مقواك
واليوم هالكانون غاد شبابيك = تلعب به الارياح من كل شباك
يا مالك اسمع جابتي يوم اوصيك= وأعرف ترى يابوك بآمرك وانهاك
وصية من والد طامع فيك= تسبق على الساقه لسانه العلياك
أوصيك بالتقوى عسى الله يهديك = لها وتدركها بتوفيق مولاك
أحفظ دبشك اللي عن الناس مغنيك=اللي ليا بأن الخلل فيك يرفاك
إجعل دروب المرجله من معانيك =وأدراج سيسها على العز مرقاك
لا تنسدح عنها وتبغاني اعطيك= جميع ما يكفيك ما حاصل ذاك
أحذر أمر ليعات تبيها لتاليك =أيضا وترخص عنها قدر ماواك
أدب ولدك إن كان تبغيه يشفيك=وأستسعفه من بعد مرضاه بالاك
أما سمج واستسمجك عند شانيك =ويفر من فعله صديقك وشرواك
والا بعد جهله ترا هو بياذيك = لو زعلت أمة لا تخليه يا لاك
إحذر تضيع كل من هو ذخر فيك = معروفه لا تنساه واوفه بعرفاك
ترى الصنايع بين الاجواد تشريك=إليا طمعت بركزها لا تعداك
وأوف الرجال حقوقها قبل تعنيك = لا تعتمد بالعفوّ فالحق يقفاك
وهرج النميمة والقفا لا يجي فيك = وأياك عرض الغافل أياي وأياك
تبدي حديث الناس وفيه تشكيك = وتهيم عند الناس بالكذب واشراك
وإذا نويت إحذر تعلم بطاريك= كم واحد تبغي منه عرف وأغواك
وأحذر شماتت صاحب لك مصافيك= وليا جرالك جاري قال لو لاك
ولا تحسب أن الله قطوع يخليك= ولا تفرح إن الله على الخلق بداك
أنشتهى حط الطمع في تواليك =لوّ مالقيته يافتى الجود يلقاك
والضيف قدم له هلا حين يلفيك=من ما تنوشه يافتى الجود يمناك
أكرم قبالِ فنها من شواديك =وأبذل لها المجهول مدام يعناك
إحذر تلقي الضيق مقرن علابيك= خليه محب لك صديق ليا جاك
ووصيك زلات الرفيق أن عثا فيك=ما زال يغطاها الشعر فاحتمل ذاك
راعه ولو ما شفت إنه مراعيك =عساك تكسر نيته عن معاداك
لا تامنه واطلب من الله ينجيك=ويكفيك ربك شر ذو لا وذولاك
شفني أنا يا بوك بآمرك وانهيك =عن التعرض بين الاثنين حذراك
إذا حضرت اطلابه مع شرابيك= اسع لهم بالصلح واللاش يفداك
ابذل لهم بالطيب ربك ينجيك = ولا تجضع الميزان مع ذا ولا ذاك
أما الشهاده فادها إن دعوا فيك=بين عمود الدين لا عميت أرياك
بالك تماشي واحد لك يرديك = طالع بني جنسك وفكر بممشاك
رابع أصيل في زمانك يشاكيك =لا شاف خملاتك عن الناس غطاك
وحذراك عن طرد المقفي حذاريك= عليك بالمقبل وخل اللي تعداك
ثم إلعن الشيطان حذراك يغويك=ترى أن تبعته لشرابيك وداك
وأوصل لا تشكي علينا بلاويك= انت السبب اطرفت عيونك بيمناك
وإعرف ترى اللي قد وطا الخل واطيك= ولا أنته أعز من الجماعة هذولاك
ألمسك يا راسي عن الذل وأخطيك= وأحذر تكلم يالساني وحذراك
وألطف بجارك ثم قم دون عانيك =وافطن لما يعنيك عن ربعة اخواك
ياذيب وإن جتك الغنم في مفاليك =فاكمن لي حيث الرعايا تعداك
ياذيب عاهدني وعاهدك مارميك =مرميك أنا ياذيب لو زان مرماك
والنفس خالف رايها قبل ترميك= ترى لها الشيطان يرمي بالأدراك
ومن بعد ذا لا تصاحب النذل يعديك =عن صحبة الانذال حشاك حشاك
ترا العشيره النذل يخلف طواريك= وأنا أرجيّـنك ماتجي دون آبـاك
والهقوة أنك ما تجي دون أهاليك = ولا ذكر عود الورد يثمر بتمباك
والحر مثلك يستحي يصحب الديك=وإن صاحبه عاعا مععات الادياك
لا تستمع قول الطرف يوم يلفيك = بالكذب يقضي حاجته كل ماجاك
من نم لك نم بك ولا فيه تشكيك= وألياه قد أزرى رفيقك وزراك
عندك حكا فينا وعندي حكا فيك =وأصبحت كارهنا وحنا كرهناك
ما خطاك ما صابك ولو كان راميك =واللي مصيبك لو تتقيت مخطاك
مير استمع مني عسى الله يهديك=أنصحك يا ما لك لك الله مولاك
عندي مظنه ما تمثلثها فيك = واطلب لك التوفيق من عند مولاك