قال الذي حده زمانه على الضيق = ويلاه من دنيا غشاني خطرها
تأخذني الدنيا على غير ماطيق = وضيم الليال السود حالي دمرها
حلــّـق بي الحرمان والهم تحليق = الى أرتفع نجمي يطيح أبحرها
مدري تعاسة حظ والا توافيق = والا عيوني خان فيها نظرها ؟
عندي تساوى الوقت مافيه تفريق = وأيام عمري قام يسقط زهـرها
طــّوقني الحرمان بالخوف تطويق = حتى الهقاوي مابدت لي صـّورها
كثر التــوّجد يحرق القلب تحــّريق = غبنه على من زاد عينه سهرها
يحداني الهاجس عسير الطواريق = وأضحك على روحً تموت بقهرها
تسابقن مثل الرماح المزاريق = بيدين عــدوانٍ تزايد سطرها
وجد اليتيم اللي جفوة المخاليق = وياويل حالي كان هـذا قدرها
أركض ورى حلمً قليل التوافيق = داج الصحاري وزار غبة بحرها
لا الوقت وقتي والزمن يبّس الريق = ووجز بشرح السالفة وأختصرها
همً بقلبي فوق هم المشافيق = أحرق خفوقي والمشاعر دمرها
تلعب بي أقداري جنوباً وتشريق = وأشملت لديار الشمال آخبرها
مريتها حافي قدم دون تعويق = حتى حداني بردها عن سمرها
ماجيت أدوّر للحقايق مواثيق = ولاجيت أعــّري زيفها وأحتقرها
جيت بشموخ الطيبين المطاليق = اللي مطاليق اللحى تعتبرها
شمس الحقيقة كنها النور توثيق = اليا أشرقت غاب الظلام بسفرها
عـزمي وأعرفه فوق كيد المطافيق = أن ماكسبت الغانمة ماخسرها
ماهمني من لفــّـق الكذب تلفيق = تبطي أعلومه ماتـبّـين ثمرها
والشجرة اللي شامخة تشبة طويق = لاضاق وقته جالها ويخبرها
مايجتمع قلبين بين المخاليق = الا وحديهن روحه اللي سحرها
لو أحسبوني من حساب العشاشيق = عمر الموده ماشكت من أسرها
أنا هنايه مايجي بالتشافيق = قصة غريبه ماتكــّـذب خبرها
وقعت فيها غصب من دون تبريق = وأضفت علـّي أترابها في حفرها
أن صحت مابه صوت وأزريت لاويق = ومن شاف له صوره تعيسه ذكرها