الله من هم ٍ على هم ثاني = تطاولن والقلب عنهن نحيته
البارحه سهران ليلي واعاني = فكرت والتفكير رحت وخذيته
سهران حتى بان سهيل اليماني= وهموم صدري صارخه مستميته
ودنيت صفح ٍ والقلم مكلماني =كتبت قافي والورق به مليته
وزنتها ونقيت جزل المعاني = من فن نبعي مصّخره ماشتريته
قلته وأفكر وافتكر في زماني = والقلب هاجوسه على مانتويته
أفكار والتفكير فيها بلاني = مار البلا بالقلب يوم ٍ نهيته
عيا علي وزاد يمي وحداني =حاولت أغض الطرف لكن تليته
جداي قافي واكتبه في ثواني = من هم وقت ٍ زايد في مبيته
ماغير نفسي والقلم والتماني = لاضاق بالي جيت عالي ورقيته
من وجد مابي مرقب ٍ راس باني= رجم ٍ تعلى معتل ٍ واعتليته
وجدي على اللي فعلهم بالبياني = لو كان عصر ٍ ماضي ٍ ماوعيته
لاقيل منهم قلت ربع ٍ دواني = ربع على الطولات راحوا شتيته
تفرقوا والدار عنها اقفياني = واطلالهم من عقبهم كالصميته
ياما حموها بمرهفات ٍ اسناني =طعنن وكزّ ٍ والعدو في كحيته
ليا اعتلوا بمكاظمات العناني = صفرٍ عليهن يحتمون الفويته
عدوهم لو كان من وين كاني = عقب الطنا ينقاد قود ٍ يميته
ريف الهجافا مقلطين الصياني = عاداتهم لاشك تبقى نحيته
ليا لفاهم هاشل الليل عاني = يقلط على جزله من الظان عيته
ماكن واحدهم وطا بالمكاني =راحوا وقفوا بالليالي السميته
وقت ٍ قديم وماضي ٍ مالفاني =ماباقين ياكود علم استقيته
ولّو هله مقفين بشر وحساني = وين الذي بالكار مذكور صيته
راحت وولّت وأقبلت للهداني = اليوم صار الطيب منهد بيته
ارخومها بروس عال المباني = وحرارها مسترسل ٍ في كبيته
دار الزمن والوقت هذا جفاني =وعييت أنا بالحيل حتى جفيته
لو هو لفاني وحافني واحتواني = أنا الذي من أول ٍ ماحتويته
ومهما تغير وقتنا ماوطاني = أعانده وبراس رجلي وطيته
ماهمني وان لامني من لفاني = أمشي بدربي وعارفه لانتويته
واللي تركني عافني مانصاني = والله ماني غاصبه ولاانتصيته
وبعض العرب امقابله به هواني = ولد الردي واللاش خله ببيته
عند الحليله خايب ٍ بوبهاني = عنه تشوم نفوسنا ولا لفيته
معروف فعله بين قاصي وداني =لو تمدحه بين الملا أو شنيته
اللي وقت الضيق يجيك عاني = وليا بغيته بحاجة ٍ مالقيته
يروغ روغه يشتبه بالحصاني= عند اللوازم ينفرق لابغيته
وش عاد لو هو جايد ٍ بالدواني = يعدّها ويمنّها لا عنيته
عفن ٍ كذوب ٍ منكر ٍ مسرداني= لو إن خماله دايم ٍ له رفيته
شرواه مثله ساقط ٍ بالطماني = ضحضاح دوّ ٍ بالخلا لاتليته
خله يولي ولعبته باجنفاني = عليك باللي ماشي ٍ مامشيته
بالطيب عدّ ٍ زامي ريهجاني = تلقاه عندك والم ليا نخيته
يمناك كان الوقت فيه اروغاني = لو تعمده ماقال هذا عطيته
بالدين يمشي وللردى مايداني= حفاظ سلمه يذكرك لو نسيته
بالطيب حاظر ماتقفّاه واني = مايذخر الماجود وان كان جيته
للمرجله سباق ماقال ماني =والا العفن متحتحت ٍ في فتيته
ومن لاكسبها باول صباه فاني = العمر يمضي والليالي تميته
ويالله يارزاق راع الحساني = استغفرك عن كل ذنب ٍ حكيته
نسألك عفوك والرضا والجناني =ياواحد ٍ ماغير عفوك رجيته
اسالك ربي يا آلهي تهداني = وتفرج هموم ٍ باقيه في سبيته
وتفرج لمن وقته غدا مكرباني =دربي ودربه يفتخت ماتليته
مظلوم أنا مارنّي اليوم جاني = لو كان فعلي بالملا ماجنيته
ليت إن زماني فاتني ماتناني = وليتي سبقته مبطي ٍ ماتنيته