ساعي بريد المرجلة دوك بالحال =مخطوطة الخفاق معها هدية
وحروفها الشرّد عذيّات الامثال =تفوح طيب وريحها مقدرية
خذهن شمال ودرب عذفاء على جال =هضبة متالع وايسر العابسية
وانحر طبرجل والسحيبا وماطال =روؤس الخشوم النايفات العتيه
تنصا سعد ناصر نعم طيّب الفال =رجل شمخ بالطيب بين البرية
لوتنشد سكاكا تغّنت بموال =للوافي الدندون زبن الوفية
وتعطيك نبذه تختصر ذرب الأفعال =مضمونها رجال طيب وحمية
ضلع النشامى للشغاميم مدهال =ربّاه طيب اعروقه الأوليه
رجلن يساوي بالعدد ألف رجال =فعلة ( ينومس كل غلبا الأبية)
يازاكي العرقين ومعرب الخال =أصلة ( عريب ) ومرجع التغلبية
وسيرة ربوعة سيرة عالها عال =تفوح مجد ورائحتها زكية
حنا سبيع مطوعة كل عيّال =كعاّمة الغاوين والعنجهية
وحنا سبيع اللي على كل شملال =خضنا جراب وهية الحرملية
وحنا سبيع معلقة بيض الآمال =على جبين الكون والجاذبيه
من غير قاصر بالقبايل والابطال =ولانطمس الشيمات والعنقرية
وأرجع لممدوحي على رووس الأقذال =مع طيب ذاته رتبتن عسكريه
يشوش لامنه سمع صوت هشّال =طرقي ظلام وحدته سرمدية
ويباشره يامرحبا هاك فنجال =بهّر بهيل وزعفران وتحية
روضن تخّير في نواحية منزال =وأسلوب راقي مازجة بأريحية
أفخر بفعلة واعتلي شامخ الجال =وارقا بنوماسة على الفيصلية
طيبة سحابٍ لاسرى الليل همال =ينعش هطولة سهلةٍ جرهدية
وسلاسته نسناس في جال شلال =وارق من روح الخوي مع خوية
انا مدحتة مااقصد جنية وريال =ولا أبي ورى ماقلت شي وعطية
طيّب ومن ربعي وأنا رايق البال =ويستاهل العذبات والأبجدية
كفو يابوناصر بنى مجد الاجيال =وحنا شمال نمثّل العامرية
وختام بوحي مالرعد له تجلجال =ومالعلعت فوق الخضر راعبية
وماجر ملهود الخفى كل موّال =تجر حزنه شيلة السامرية
من وسط ( حائل ) لأعذب الحرف مرسال =و منّي لأبو ناصر سلام وتحية