يابنت حِنا من هَلَ العُرف والدين=نكبَح جِماح النفس لو في مَهَدها
ولا نطيع ابـلـيس نبقى موالين=للي وَهَب مَريم عِناية وَلَدها
أصحاب صَطوه في جَميع الميادين=وحنا غِمار المعركه في صَددها
ابو غريب العبدلي وقته الحين=والأطرق الهذال نارٍ وَقدها
من بينهم واحد نعده ملايين=والثاني نعده ابوها وجدها
إصلاح ذات البين باللطف واللين=نار الفِتَن لا شارفتنا خَمَدها
من صُلب وايل عالعدو وائلين=من لابةٍ ما خاب من هو نشَدها
والمسجد الأقصى بليا مُصلين=القبله الي مصطفانا سَجَدها
عهدٍعلينا يحترينا من سنين=يمسي ويصبح في غياهب أمدها
والّي خَلَق آدم وحوى من الطّين=وانعم علينا قبلةٍ نفتقدها
ما نـهتني إلاّ نحرر فلسْطين=من يَدِّ من دنَّس معالم جَسَدها
ندحَر بَني صهيون ما عاد مبْطين=والعين ما تنطاق زلة رَمَدها
ونبقي سيوفٍ في نُحور المعادين=في روض من يزرع صَلابخ جَلَدها
بالأمس جاهم قايد جيوش حطين=ثاير مع القوات يالي حَشَدها
طهَّر أراضي دنَّستها الشَّياطين=واليوم واجبنا ولا من جَحَدها
وكلِّ من فينا شباب ومسنّين=لا بد ما نبقى أمان وسَندها
دامت علينا نعمة إنّا مسلْمين=وسيوفنا ما تندثر في غَمَدها
ندعي بعون الله عسانا مجابين=يالله أمجاد العرب نستَردْها