مسا الخير للجميع

جدة ياحريق ياغريق

هكذا هي الاقدار ولكن اتت بفعل فاعل وتاخذله

ابيات كتبتها في حادثة الحريق التي وقعت في احدى مدارس محافظة جدة وذهب ضحيتها من ذهب من الابرياء


اتمنى ان تنال استحسانكم


الحزن غير


في كل عام اشوف للحزن عنوان
غطى على جده وساحل بحرها

حزنٍ عظيم وصعب يقواه الانسان
ماتحمله صم الجبال وصخرها

الحزن غير وديرته غير يا فلان
ابكى عيوني والخواطر كسرها

وشلون ماحزن والوطن كله احزان
والحزن الاول بالقناه وخبرها

اصبح على الاحزان باشكال والوان
وامسي على دمع العيون وكدرها

وشلون ماحزن والزمن مابه امان
اخاف من سود المزون ومطرها

واخاف في مدرستي تشب نيران
واخاف من دنيا الفساد وبشرها

وشلون حنا غير عن كل الاوطان
ياناس داري من هو اللي دمرها

ليه التخاذل والعواقب والاثمان
ارواحنا اللي كل يوم انخسرها

من كارثة جده نزل دمع الاعيان
واليوم الانفس زاد فيها قهرها

شفت الصبايا تحترق مثل الاغصان
والكارثه للحين ماحدٍ حصرها

وريم النهاري قدمت درس مجان
بالتضحيه واحلى معاني صورها

ضحت لاجل هند ولاجل شوق وافنان
واعطت دروسٍ للحياه وعبرها

راحت وموقفها يخلد بالاذهان
لو طالت الدنيا ما تنسينا اثرها

والغير ضحى لاجل روحه بالاكوان
عايش حياته والامانه بترها

قالوا حريق وقدر الله وما كان
هي حكمة الله للعباد وقدرها

لكن ترى ياناس للمشكله جان
من دون حق ارواح غيره هدرها

خاين وفاسد ما تعامل بالاحسان
همه رصيده والبنوك احتكرها

يادارنا عذرا نبي وقفة انسان
صادق وحازم والبلاد يعمرها

يحاسب المخطين باخلاص وايمان
عينه لاجل داره يطوول سهرها

اما كذا ولى ترى مابه امان
دام الخيانه كلبونا سترها


وسلامة الجميع

اخوكم


ابراهيم السلمي