لو الزمان يعيد حبك وينعاد = انسى ليالي البعد واللي جفوني

جمر الغلا في غيبتك صار وقاد = يشعل فتيل الشوق هاجس ظنوني

يالغاليه صبري مسافات وابعاد = والشوق دمعة حايره في عيوني

الوقت في شوفك مسرات واعياد = وان غبت عني طاولتني اطعوني

العيد من دونك معاناه وسهاد = حسبي عليهم كان عنك حدوني

يانبض روحي ماتهنيت برقاد = لاجيت ابرقد هيّضني اشجوني

اسهرت عيني واكثر الناس هجاد = وعهد المحبه بيننا مايهوني

ياناعم الخدين .. ياغض الانهاد = يا ام العيون اللي حورها فتوني

ياوردة ٍبين النفل عطرها ساد = يا ليتهم من عطرها طيبوني

ودي اشم العطر لافاح من غاد = واحضن حبيب الروح لويعذلوني

حبك سكن بالقلب يابنت الاجواد = ولا فيه غيرك في حياتي يموني

يحفظك ربي من بلا كل حساد = ياللي مليتي بالغلا كل كوني