الليل له عندي مقام ومكاني=رفيقي اللي لويجورون ماجار
لاقبل ظلامه حل عقدة لساني=اسهر معه واسامره لين الاسحار
ابديت له سري وخافي زماني=يومٍ غيره ضاقبه كتم الاسرار
له اشتكي همٍ بوسط المحاني=من صاحبٍ تقطعت عنه الاخبار
حبه تملكني وحظي عصاني=مدري نساني او تصاريف الاقدار
ياويل قلبي كان خلي نساني=والله لاضيع وتالي العمر بشهار
ابعد ومن بعده فقدت الاماني=كني سجينٍ خايف لحظة الثار
مقدر على فرقاه لوهي ثواني=حبه سرى بالدم والقلب له دار
حتى القصايد له تحن وتعاني=قصايدي عن وصف غيره لها اعذار
ماطعت في حبه عذولٍ نهاني=ولاردني عن صاحبي كثر الاشوار
وشلون ينساني وينسى حناني=وينسى دموعٍ يوم لقياه تنثار
وينسى مواعيدٍ عليها احتراني=وينسى عزومٍ يوم فرقاه تنهار
ياليل خبر صاحبي لو نساني=منساه لو تنسى البدو حشمة الجار
بعطيه ودي لو جحوده عطاني=وابقى على عهده لو ان الزمن دار
ياليل كل اللي سمعته أماني؟؟=خلك على سري كتومٍ وستار