الله من قلبا بهالوقت شاقي = عيت مقادير الزمن لا تصافيه
ماينتهي حزني بقت له بواقي = اسهر ليا نامت عيون المداليه
أبرمت مع حلو السنين اتفاقي = والوقت ينقض كل عهده ويمحيه
الصبر يورث بالكبود الفتاقي = صبرت لين الصبر شالت عراويه
حط الغراب اللي بصوته نعاقي = وطار الحمام أسراب عني وأنا أدعيه
لا الوقت منصفني ولا العمر باقي = العمر ثوبا لازم الدهر يطويه
ياطول دربي يوم انا اتعبت ساقي = مثل الذي يطرد سراب المهاميه
كني سجينا في يديه الوثاقي = يرسف حديده يوم يسحب خطاويه
متهوم ظلم ولفقوا له لفاقي = وهو بري من كل ماسولفوا فيه
خلوه ربعه ماسعوا بالعتاقي = وهو وحيد أمه وهي بس تبكيه
تقطع على شانه بعيد الطراقي = ولا لقت من يطلعه من بني خيه
يوم شافته وسط المحاكم يساقي = طاحت وماتت قدم وجهه وعينيه
وقام وحضنها واعتنقها اعتناقي = يحب رجليها ويصفق بكفيه
حالي مثل حاله شربنا دهاقي = كاس الزمان اللي بلنا لياليه
ودوني اخواني لنافث وراقي = وقرا علي وقال يارب تشفيه
قلت الشفا ياشيخ يوم التلاقي = الله يرجع كل غالي لغاليه

الاخ عبدالمحسن

قصيده رائعه تستحق القراااءه ومعاني اروع

ياطول دربي يوم انا اتعبت ساقـي // مثل الذي يطرد سـراب المهاميـه
كني سجينـا فـي يديـه الوثاقـي // يرسف حديده يوم يسحب خطاويـه
متهـوم ظلـم ولفقـوا لـه لفاقـي// وهو بري من كل ماسولفـوا فيـه



صح لسانك وسلمت يمينك

دمت بخير