ياصاح لاتشكي وجع كلي اجراح=وجروح ماهي يا صحيبي جدايد
ماهو لحالك تشتكي ضيم واتراح=يا كثر من عاش الحياه بلهايد
كم واحدن يضحك مع الناس بافراح=ويجر مواله سبب هم كايد
شفني انا هذا انا شخص مرتاح=لا والله الا في حياتي شدايد
مالاح في عمري فرح بد مالاح=ولارتحت في ظل القصور الشوايد
ان عشت بالذكرى غدت كلي جراح=وان عشت يومي ماجنيت الفوايد
الحظ من جرف التلاكيع لقراح=طايح ولا ضني تفيد الجلايد
واحرق قلبي حرق غصن(ن) لياطاح=في وسط نار(ن) من لهبها وقايد
او حرق قلب أم(ن) من الخوف نواح=على جنين(ن) صدروبه شرايد
صدو ولا ردوا مع الدرب رواح=ودموع عين امه عليه تزايد
هذا انا في بحر الاحزان سباح=في مده وجزه خذيت الشهايد
وعلى كثر ماجتني سيوف ورماح=مازلت واقف في طريق الجهايد
ماقلتها قصدي تماثيل وامزاح =ولاقصدي انقض للجروح العدايد
همي كما سيلن مع دمعي انزاح=ونود على عوج الضلوع الجرايد
ماقلتلك اضحك وانا كلي اجراح=اضحك عسى ربي يجيب السعايد