يا خي اثاري الغرب فعلا مساكين=ما عندهم حاكم بحكمه مخلد
رئيسهم حكمه فقط اربع سنين=وان وافقوا له يمكن انها تجدد
يعني ثمان وبعدها يالله تعين=لازم يغادر بالزمان المحدد
واليا نوى يسرق من المال قرشين=صاحوا عليه وصار وضعه مهدد
بالمختصر مسكين او بين قوسين=ماهو مثل حال الرئيس المسدد
والمشكله حتى الأوادم كسولين=ما فيهم اللي صاح باسمه وردد
ولا عندهم شاعر تبرع ببيتين=يمدح بها حضرة سمو الممجد
يا أمة الغرب الهزيله وبعدين=متى متى هذا الظلام يتبدد
اصحو يمال النايبه وافهوا زين=وشوفوا الشعوب الراقيه يا مقرد
حنا قصايدنا تشكل دواوين=يعني اذا عديتها ما تعدد
نمدح بها حاكم قلوب الملايين=اللي ورث هالأرض من جد لي جد
وحيد في عصره ولا منه اثنين=بالتجربه ماهو كلامٍ مجرد
واللي خلق خلقه من الماي والطين=استغفرالله خالقه من زمرد
ودايم نحس انا لشخصه مدينين=ولازم نعرف انه من الله مؤيد
ياللي تقول انه حرامي وبعدييييين=اركد.. قبل ما تروح فيها مؤبد
يالخبل هذا فاهم المسأله زين=والمال ماله كيف يسرق من احد
ترى البلد فيها نظام وقوانين=فاعرف حدودك بالنظام وتقيد
ورئيسنا فاهم بكل الميادين=ومن زود علمه ما يقلد يقلد
حكمه سياسه فلسفه هندسه دين=وقصايده في كل مجلس تردد
ويمكن لو انه في زمان ابن حثلين=ماكان بن حثلين ذكره يمجّد
ولا تسألوني كيف راحت فلسطين؟!=رئيسنا زبّد وطبل وهدد
واكثر بعد يشجب ويحتج ويدين=يشهد له الإعلام في كل مشهد
يمكن عرفتوا كيف صرتو مساكين=يالغرب ياللي مالكم رب يعبد