البارحه والشعر بالراس مزحوم = وكن الفضا ماعاد فيه اتساعي
وشوفي بعينى والكرى يطرد النوم= جاني وانا مالي عليه استطاعي
دار الزمان وشاهد الشعر مرحوم= حتى لبس راع الهزيله قناعي
شاعر ولا وثق قصيده عن القوم= حتي غدت منه الحصاني سباعي
شاعر رفعت خشوم ونزل اخشوم =واحوش رزقي من سواعد اذراعي
ونفسي على ذنبي توردني اللوم= ولانى على الدنيا كثير الطماعي
ومن خلقتي ما اسوق رجلي على رخوم= وليا سعو لي فلت هذا انقطاعي
واشوم عن شيخ الردى وابعد الحوم= واقرب الطيب ولو كان راعي
حتى لو انى صرت بالناس مذموم= ما احمل اخصال النفاق بمتاعي
ساأتني وانا بلياك مهموم= ودك تدون قصتى وانطباعي
يا صاحبي يمكن مقدر ومقسوم= تكتب مقادير الليالي ضياعي
وكم عالم بالناس ماهو بمعلوم= وكم جاهلٍ معلوم باسمه رباعي
الوضع ماهو وين ترجع من القوم= يا صاحبي ماعاد للقوم داعي
شف كيف صار الحر يلعي مع البوم= وحتي الدجاجه في زمانك تعاعي
ونجوم صارت بالسماء ماهي نجوم= دقق بها تلقي بعضها اصطناعي
وياصاحبى حتي القمر دونه غيوم= وماعاد يرسل للبسيطه شعاعي
تبغي الحقيقه وضعنا صار مفهوم= يعني كثير من اطيب الناس ضاعي
واليوم هذا بين حاكم ومحكوم= وضاعت مفاهيم البطل والشجاعي
هذا وانا ماني على الشعر ملزوم = لاكن هجوم بثورتي واندفاعي