أيه غبت ! وعادي ليا غبت ..وين المشكله ؟؟=مدام شفتك غايب ٍ عنـي بمحـض إرادتـك
اللي أعرف أني ليا من غبت يحرقـك الولـه=لكن قسم بالله هالمره ماهي مـن عادتـك !!
اذا انت تذكر أو بلاش .. القلب عندك وأسألـه=متى مشاعر خافقي ماتت بحـرب إبادتـك ؟؟
وإذا انت ناسي مستعـد آقـول شـي ٍ تجهلـه=اني قتلت " احلامي البيضـا" لجـل سعادتـك
ياللي فراقك مستحيـل استصعبـه واستسهلـه=وان نقّصت مني جروحك بالهوى ..مازادتك !!
تعاااال آبفتح "دفتر الذكـرى" معـك وآتأملـه=من بعدها عطني ليا مني خلصـت .. إفادتـك
تذكر من أول يوم شفتك صاب خطواتي عجله=يوم ان عيني كل مالديـت عنـي صادتـك !!
يوم أني امزح معـك وآثقّـل عليـك الأسئلـه=لاقلت : ببعد ..قلت : يا "ويلك" و "ياقرادتك" !!
وتكرب "حجاجك" لين مااحس القصيـد يعدلـه=حتى غمرني ذوق إطراءك وحسـن إشادتـك
تذكر يوم " ألبوم الصور" جايبه بيدك تحملـه=وفتحته ووريتنـي "صورتـك" يـوم ولادتـك
تذكر على " تسريحتك" "بوكيه ورد" و "مكحله"=و "كروت مبروك النجاح " وجنبها "شهادتك" !!
تذكر "شعرك" اليا تدلى قمـت بيـدي آعزلـه=حتى لمحتك ناحت ٍ حرفي بوسـط "قلادتـك"
يوم ان نويت آرحل وقلت : الليل تّـوه بأولـه=حتى رجاويـك بجلوسـي كلهـا.. مافادتـك !!
والحين غبت وعذرك الواهي عليّ إني اقبله=مدامك أعلنت بخفوقـي حكمـك وسيادتـك
المسأله ماهي على فرقاك ..كـل المسألـه=وشلون بالك يستريح ليا حضنت وسادتك !!!

4 / 10 / 1430 هـ

كان لي شرف المرور هنا
صح لسانك استاذي
عدد بلا مدد
اللي أعرف أني ليا من غبت يحرقـك الولـه
لكن قسم بالله هالمره ماهـي مـن عادتـك !!

تذكر "شعرك" اليا تدلى قمـت بيـدي آعزلـه
حتى لمحتك ناحت ٍ حرفـي بوسـط "قلادتـك"

الرائع والمتالق
الشاعر سعود العواجي
صح لسانك وبدنك ولا هنت على ذائقتك الراقيه
شاعريه مميزه وذوق عالي ونص مميز
واتمنى لك التوفيق
دمت بخير
تحياتي ومودتي