عبدالرحمن اليمني 12/03/09 (09:31 AM) ماقيل من أشعار في الشعلان مكرمين الجار   هذه القصيدة للشاعـر الخيبري أحـد موالي الشيخ نواف بن النوري ابن شعلان يتوجد على الشيخ نواف حاكم الجوف سابقاً ويسند على الشيخ فواز بن نواف الشعلان والشيخ طراد بن سطام الشعلان فيقول : الـبـارحـة وسـط الحـشـا دك دكـاك = بالصـدر نـار وبـالـنـواظــر شـرارا على الشيوخ اللي يقولون لي هاك = غـابـت نجـوم مضلـلـيـن القـصارا يا جوف عقب مبيّد الهجن عفـناك = الا أن ضهـر سلطان مثـل الـمنـارا راجـت ذلولـه تـقـل شراب تـنـبـاك = مـا لقـت كـود الخيـبـري والـعـذارا راجــت عــلـى ذولا وذولا وذولاك = وأقـفـت تحـن ودمـع عـينـه نـثـارا لاجت على الماء راسها تقل شبّاك = مـع ظـن بـالـي غــادي لــه حـوارا أنـتي غـدالـك حاشي تـقـل مجكـاك = أمــا يـمـيــن الـبـوش ولا يــســارا وأنـا غـدالي مـدبـس الخيـل فكـاك = فـك الطـريح مـن الجـموع الكـبـارا يـا عـم يا نـواف مـا والـلـه أنساك = يـا كـود يـنـسـن الـرجـال الـعـــذارا يـهـل دمـعـي كـل مـا حـل طـريـاك = ثـلاث وأربـع فـوق عـيـنـي تـبــارا يا طـراد يا عـز الخوي لا عدمناك = الـحـر مـثـلـك يـفـتـهـم بـالأشــــارا فـواز لامن عسكر الريش يشفـاك = يـا عـل مـا يـنـثـر عـلـيـه الـغـبــارا وأن كان ما أنت اتسيّل الدم يمناك = راحت ربـوعي يا أبو سامي فـرارا لانـي أبــو عـيـلـه ولانـي بـمــلاك = ولانـي مربـوط ولا برجـلي هـجـارا حملي خفيف وخالقي حل الأشراك = والـذل يـبـرك فـوق راس الحـبـارا وصـلاة ربـي عــد مـا دار الأفـلاك = وأعــداد مـا دار الـقـلـم وأسـتـدارا وهذه الأبيات من قصيدة طويله قالها عتيق بن مطلق بن رمال يمدح الشيخ النوري بن هزاع الشعلان ويعم الشعلان وقبيلة الرولة فيقول : جينا لشيخان على الحـرب عاصين = حامـينهـا عـن كـل خـوف ومـذلـه يـا حـي والـلـه قـربـكـم يالشعـاليـن = قـريـبـكـم مـا جـاه ظــيـم ومـمـلـه قـريـبـكـم مـا قـيـل ديـور ولا شـيـن = يـدلـه مـع الـويلان مـا أحـدٍ فطلـه يا مدلهيـن الجـار مـا أنـتـم خـفييـن = شيماتكـم بـدت عـلى النـاس كـلـه حـكـام فـريـس شـيـوخ وسلاطـيـن = والـكـل مـنـكـم لا أخـذ الـرمح بلـه وفهدكم الـلي صيدتـه نـادر العـيـن = والـيـا مـدحـتـه صـيـدتـه فـاطـنلـه أبـو نـواف اللي على الخيل نعميـن = إلـى ركـب فـوق الجمـوح السملـه ويا عـلكـم طـول الليـالي عـزيـزيـن = بجاه الرسول وجاه من يطلب الله ولا قـلتهـا قـصـدي مـدور تـثـاميـن = الـرزق مـن ربـي وأنـا خـاضعـلـه وصلوا على اللي بيّن الحق والدين = المصطـفـى شـفـاع لـلـنـاس كـلـه الشاعـر فهد بن صبيح الرويلي يوصف أحد الوقعات ويذكر بطولة خلف بن زيد الشعلان الملقب ( الأذن ) العـلـم جـانـا فـوق مصلـوبـة الكوع = عـلـمٍ يـسـقـي للـضـمـايـر نـقـاوي أخوان رفعه كـل أبوهم عـلى طـوع = وعـلى العقـيـد يعـاقبـون الأهـاوي ركض عليه ريف من يشكي الجوع = وخـلا جـواده تـدهـكـه بـالـحـذاوي هـو والفـرس خلاه بالقـاع كرسوع = وطـاح العشا للعبـد هـو والفـداوي بشلف تقص الدرع والجلد وضلوع = لهـن ثـلاث كعـوب بحـد الـرشاوي وكـم واحد من جنبه الرمح مشلوع = أعـراش راسـه جـادعـه للضراوي والـلي نجـبتـه للعـشـا ذيـب ميقـوع = عـزم عـلى الفضلـة ثمانيـن واوي هــذا تــوطــنــه وهــذاك مـمـنـــوع = مـن حـر ضـرب معطبين الأهـاوي وخلف الأذن اللي على القوم قاطوع = يـزود لا كـثـرت عـلـيـه الـبـلاوي وكـم واحـدٍ خلـوه والراس مقطـوع = عـلـيـه رويـلات تــزج الـغـنـــاوي وهذه القصيدة قالها الشاعـر عواد بن مقبل الشبيبة من موالي الشيخ سطام بن شعلان يرثا الشيخ ممدوح بن سطام الشعلان : بـرق تـلالا شـاق عـيـنـي ضويـحـه = مزنه يهل وبالسما ضاح له ضوح عسى المطر يسقي جناب السطيحه = يسقي شغـايـا وادي فـيـه ممـدوح طيـر السعـد نسـل الوجيـه الفلـيحـه = جعل فداه اللي على المال مشفوح شيـخ الشيوخ الـلي لـربعـه منيحـه = ما هو من اللي شيخته بس للروح شيخ الشيوخ الـلي عـلـومه مليحـه = الـلي نـهـار الـكـون للـضـد ذابـوح يـا ليـت علمـه مـا وصلنـا صحيحه = حتى تجف دموع عيني عن النـوح ليتن حضرت اللي يصيحه وأصيحه = أو ليتني مع ذبحت الشيخ مذبـوح يا عيـن هيـدي وأهجعي يا وكـيحـه = كثر البكا يا عيـن ما فيـه مصلـوح الشاعـر مخراز المرعضي الرويلي : عـفيـه قعـودي قـام ينـزح بـراعيـه = عـن شيبـة ما عـقبت من جهـدهـا عـفـيـه قعـودي بالمـقـاديـم غـاذيـه = سـلايـل الـبـلـهـا سـبـوق بـيـدهــا محـمد جـنـه مطعـمـه مـن بنيـخـيـه = لـه كـردة عـلى العـشايـر جـردهـا من خلقـتـه يلطخ على غيـر تاجيـه = أسـلام ربـي مــار هــذي وحـدهــا يـا ليـت أنـا سطام مـا جبـت طاريـه = كـم حـل مـن قالـه وقـالـه عقـدهـا سـطـام كـل رويـل لا سـار تـتـلـيــه = وكـم حـلـة سطـام قـرشع عـمدهـا سطـام عـن الـنـاس سـده ايخـفـيـه = ولا أحـد دري عـن نيته لا قصدهـا يمشي مع الضاحي ويخفي مواطيه = ويكما السحابه وأنت توحي رعدها وهذه الأبيات من قصيدة للشاعر ابن قويفل الشمري يوصف ضعاين الرولة وغزاتهم في الزمان القديم فيقول : بلـوا صميل الخيـل والصبح رووه = واقـفـوا كـمـا غـيـم تـقـفاه نسناس ياويل غزو طلعت الشمس شافـوه = تلاوحو من فوق عجلات الأرماس ما تسمع الا عـنـدهم قـول لوطـوه = تحـدثـوا بالموت قـطـاف الأنـفـاس كـم واحـدٍ شـقـوا صميلـه وخـلـوه = وكـم جـثـة مـتدهـديـه مـابهـا راس وهذه القصيدة للشاعر عرموش الربشاني: تـشـاوروا بـالـيـل في بـيـت سطـام = الغـيم شخـّب ينتـظـر مـن يخـاويـه حـق عـلينا نرافـقـه فـرض والـزام = نسرح مساريحـه ونمشي مماشيه شلعنا من الجولان من نقـرة الشام = صار الرحيل وراعي البيت يطويه عشريـن ليـلـه كـاملـه مابهـا امقـام = مـافـيـه الـلي يفـل بيتـه ويطـويـه الياما نزلـوا فيحان مشتاهـم العــام = وتهـزعـت قطعانهـم فـي مشاتـيـه وجتهم اجموع تحتدم مثل الأعـلام = ولا الـجـراد الـيـا تـلاحـق تـوالـيـه ركبو هل البل فوق عجلات الأولام = حقـوق سيـل عـالي الطـور حاديـه فرسانهـم ملبوسهم جـوخ واكـزام = وريش النعام مشنشل الرمح كاسيه وتعـادوا مامن عـن الموت مهـزام = الـذل مـا يـطـري ولا عـاد نـطـريـه لعيون من تردع على خدها وشـام = لعن ابـو رجـل ينثـني دون اهـاليـه كدوا على الصابور يوم السعد قام = حمي الوطيس وتاجر العمر يشريه تسمع ضريس الشلف بمتون الأزلام = كم راس شيح طايح عن عـلابـيـه تلقا الرجـال مقـرطـه مثـل الأكـوام = نـجـولـهـم والـلي يتطـرّف انذكـيـه لحقوا المساوق والدخن بينهم زام = عـليـا رويـلي دوم تسمـع مـنـاديـه تـلافـتـن حـرش العـراقـيـب بـرزام = عرفن راعيهن يوم سمعن نخاويه الشاعـر خلف بن رخيص السنجاري أبو زويد : يا راكب الـلي كنهـا مسلوع الذيـب = حمرا ولا عمـر الحويّر اغـذي بـه حـمـرا تـفـج فـخـوذهـا للمحـاقيـب = حمـرا تسوف كعـوبهـا فـي سبيبـه حـمـرا تكسر من عياها المصاليب = حـمـرا وتـوه فـي جهـلـهـا مـنيـبـه حمرا وعينه لون قـدح المشاهيـب = خـلاص جـمـرٍ تـو يـطـفـي لـهيـبـه حمـرا مجـربهـا مع البيـد تجـريـب = مـع الـخـلا مـا شـد مثـلـه نـجـيـبـه أبـوه منفـلهـا عـلى الفطـر الشيـب = وأمـه خناب الجيش ما يقـتـني بـه تجـري بذرعـان سـوات الـدوالـيـب = وحـدهـا تقلطهـا والأخـرى جنيبـه أن لجلجت لـج الحصى بالنشاشيب = شـد الـرسن والعـود لا تعـتـني بـه كـن الشجـر خلفـه غدالـه جنـاديـب = عـن السهـل رقـه عفـاش الرقيبـه لا درهمـت شـدت ملاوي العصاليب = تـفـزيـز ربـدا مـاج عـنهـا لعيـبـه تـطـوي الفيافـي والسهال العباعيب = عـلـيـه بـعـيـدات المـوارد قـريبـه ريحـة عرقهـا عنبـرٍ من هلـه جيب = ولا البخـتـري بالفياض الخصيبـه سبيـبهـا يـضـفـي لـكـل العـراقـيـب = عـلـيـه حـلـيا مـن شقـار الـذويـبـه أن درهمت تفرح ضمير النجاجيب = مـا ذاق لـذتـهــا غــذي الـرويـبــه شـّذب عـليهـا مظلـم الليـل تشذيـب = كـان الـثـريـا دوبـحـت لـلـمـغـيـبـه يشوح لـك بيت النـدا بـالـمـراقيـب = منوت مناكيف الشتـا عقـب غيـبـه النجـر يضبح والدخـن كنـه السيب = ودلال صـافـي بـنـهـا عـن سريـبـه منصاك ابن شعلان هومنقع الطيب = إلـى سحب رخم الجموع الحريبـه نقـوة رويـل ولا بهـم خلط أجانيـب = يـا نعـم بالعـليـا ومـن يـعـتـزي بـه سطـام يـا ستـر البـنـات الرعـابيب = جـيـنـاك جـيـّت واحـدٍ مـا دري بـه عـنيـت مـن نـجـدٍ عـليـه مطـاليـب = جـيـتـك كـفـاك الـلـه شـر المصيبـه يا شوق من عيّت على كل خطيّـب = غيرك على كل المشايخ اعصي به بنـت الـذي لا سولفـوا بالمعـازيـب = أبـوه مـصّـوت بـالعـشا بالجـذيـبـه ذبـاح للخـطـار مـن شـمّـخ الـنـيـب = مـا قـال يكـفي دون ذبـحـه حليـبـه ما جابـت الخفرات مثلـك ولا جيـب = من مطلع البيضاء لغـربي مغـيبـه ما يستوي للبيض غيرك ضواريب = البيض خطو المشتبه وش تبي به خيلك على الأقفاي عرج تقل عيـب = ولا عـلـى الأقـبـال عـجـل هـذيـبـه ماني غشيم اسّيـب الهـرج تسييـب = والـلي زعـل يا شيـخ يلـقـا لعيـبـه وقال عبدالله بن دهيمش بن عبار العنزي يبارك للشيخ نواف بن فواز الشعلان بمناسبة توليه رئاسة قبائل الجلاس : زان المجال وفاض بالصدر منظـوم = وتهيّض الخاطر من شعور وحساس حقـك عـلينـا يـا ابـن فــواز مـلـزوم = حيثك شفيه ما أنت من سايـر الناس جينـا نبارك لك عسى العـز لـك دوم = مبـروك لـك والله يجيـرك مـن الباس يا الوايلي ما شيختـك تـوهـا اليــوم = شيختك يا نـواف مبـطـي لهـا سـاس انا اشهد أنك مـن مواريث شغـمـوم = والطيب ورث اجداد والعرق عسّاس من ساس ماكر كل مـا هـد صـاروم = مصقـر صيارم بـيـن نـادر وقـرنـاس تاريخ مجـد بزاكي الصدق مدعــوم = مـن جــدك محـمـد مـقـاديـم لـجـلاس تـاريـخ مـاضيكـم شهـادات وخـتـوم = شعـلان راس وكـل مـا عـقـبـه راس شعلان عـلمـه بـالتـواريـخ مـعـلــوم = مثـل العلـم فـي شامخ الحيد نبـراس وغريــر بن شعلان لـرويـل زيــزوم = شيخ الجهـام وللـوغـى دوم مدبـاس ضد العنيد الـلي مـن الغبـن بـه زوم = سـقـم الحريـب وللمـنـاعـيـر طساس يـوم الحرايـب يضرب القـوم بالقـوم = فوق النضى ولا عـلى قـب الأفراس إلـى ركـب يـتـلـيـه دكــلات داهــــوم = عـلى هـوا العـليا يبوجـون الأرماس أن غـربـوا مـدهـالهـم ديـرة الـكــوم = وأن شرقـوا منزالهـم نفـد الأطعـاس مـن ديـرة النقـرة إلى شـرق زلـــوم = بالخـوف ترعـى بظلهم كل الأونـاس وأن شدوا اللي عندهم غالي السـوم = أبو الظهور إن عمّـد العـج واحتاس ما يربح الـلي لديرتـه شنـوا هـجـوم = ولا يـمنعـه لو يلبس الدرع والطاس شـق الصميل بغـاطي الرمـز مفهـوم = بـه ردع لـلجانـي وبـه حـل لـولاس حتى الذي من طـاري المنع محـروم = كـب العناد وطاع عـن قطع الأنفاس يـوم الـبـوادي بـيـن هـازم ومهــزوم شعلان ما يوطأ حماهـم ولا ايـداس ويوم الجزيـرة شعبهـا صـار محكوم = بالحكم اللي زال الدياجي والأغلاس بـايـع وسلـّم ديـرة الجـوف تـسـلـوم = بـالـصـدق خـلا رويـل للحـد حـراس بخلاصهـم بـانـت عـلامـات ورسـوم = ولا يخسر الـلي كـان للخيـر غـّراس ولو ابي اعـدد مـن صناديـد وقـروم = باح المداد ولا حصى المجد قرطاس يـا بعـدكم يـا شيخ عــن كـل مـثـلـوم = ويا قربكم يا شيخ مـن كـل نـومـاس اقـولهـا وعيـن المعـادي بهـا هـزوم = ولانـي مـداري كـل هـايــف وبـلاس من حاش فعـل الطيب ما يلحقه لـوم = والجـد مـا يـرفـع حفيـده إلـى خـاس مـن خاب فعـله خامـل الذكـر مكتــوم = وش عـاد لو جده سليل ابن عـباس ومن طاب فعله عند الأجواد محشـوم = وصيد الحمايـل مـا تدانت للأدنـاس وكل المشايخ ما بهم شخص مـذمـوم = امجـاد فعـل جدودهـم ما لها قيـاس * وقال عبدالله بن دهيمش بن عبار العنزي هذه القصيدة يهني الشيخ أنور بن فواز الشعلان بقدوم نجله نواف ويثني على مواقفه المشرفة : يا شيخ في نجـل الصوارم انـهنيـك = ونقـول لـك مبـروك بـقـدوم نـواف عسـاه فـي طيـب الفعايـل ايحالـيـك = ويصير مثلك بالطبايع والأوصـاف يا لوايلي يا ريف من سـار ناصيـك = يلوذ بك وقـت اللـزم كـل من خـاف علمك شهير ويرفع الراس طاريـك = وأنـت الـذي فعلك بالأعيان ينشاف علمك ظهـر عـند البعـيـد ودوانـيـك = جدك حفظ سلم الحمايل والأشراف صـرحٍ بـني بـافـعـال جـدك يعـلـيـك = ماضي مفاخركم تسجل بالأصحاف موزيـل سجل من مفاعيـل ماضيـك = امجاد وزنه راجحهٍ فـي جبل كـاف لـو مجدهـم عن باقي الفعـل يكفيـك = المجد امانـه وأنـت شلته بالأكتـاف أنتـم هـل الطـولات مـا هـي دباليـك = وأنتـم تقـودون الجهامة والأسلاف وأنت العريب اللي عريـبه مجانيـك = نسل الشيوخ مروية علط الأسياف شيخ زهاك اسم الفخر يوم اسميـك = منزلك بالعليا على روس الأشعاف كــم واحــدٍ وده يــقـلـد مـمـاشـيــك = وأما الكـرم طبعـك كريـمٍ ومضياف وأما الحمية ما وجد من يضـاهيـك = حيثك سليل الـلي بعلـم الفخـر نـاف بالطيـب تشهـد لـك مفاعيل اياديـك = يـفـداك يـا ريـف النـضى كـل بـلاف والشاهد اللـه يـا أبـن فـواز نغليـك = وعن ما يكنه خاطـري عبـر القـاف لك موقف ماني على الـدوم ناسيك = تلك الحفاوة يـوم زرتك مع خساف غيـر الكـرامـة قـول يا الله اتحييـك = ارسلت حتى الكدلك الخاص زفـاف ساروا معه مثـل المواكـب بنيخيـك = البنز والصالون والجمس والهـاف امدحك يالصنديد بالصدق واهديـك = ابيـات شعـر ولا لنـا قصد واهـداف ولا لي جـدا لغيـر بالشعـر اجازيـك = يقـولـه الـلي بطيبكم عـد مـا شـاف * وهذه القصيدة أيضاً قالها عبدالله بن دهيمش بن عبار يمدح الشيخ أنور ابن فواز الشعلان لمواقفه المشرفة : بديت اسجـل مجمـل الشعـر بأيجـاز = ونظـم القـوافي ما عسـرني مشـده واهديـت عرفـان الثنـاء لأبـن فـواز = انــور فـعــولـه مـا قــدرنـا نـعــده مـدحـت أبـو فـواز والمـدح بـه جاز = مـدحـه زهـاه وكـل مـا قـيـل قـــده عـن الفـخـر مـا عـوقـه زل شـيـراز = ولا يـغـري المنـعـور نعـم المخـده نفخـر بطاري ريـف من جـاه معتـاز = الـشـيـخ بـابــه عــادتــه مـا يـرده للطيـب واعـمـال الفخـر دوم ينحـاز = الـوايـلي مـالـه عـن الطيـب صـده لـه بالفخـر مبـطي مشاريع وانجـاز = ويـمـنـاه عـودهـا عـلـى بـذل مـده يـسيـر ودروبـه شـريـفـات واعـزاز = مـا يحـتـذي يكسـب حـلالـه بـكـده الشيمـة الشـمـاء بـهـا الشيخ يمتـاز = ومن خف نفسه كل صاحب يـوده اشـم مـا دور عـلـى الـربـع مـهـمـاز = ولـو شاف خملات الرفاقـه يسـده البـاسـل الـلي مـن ثـقيـليـن الأ رواز = عند اللزم ياخذ عـلى الخصم هـده ابتع مـن الصنديد بالكـون مـا ايهـاز = ينحى خصيمه عـن حمـاه ويحـده انـور مـفـاعـيـل المـراجـل بـهـا فـاز = يـمشي عـلى مسلـك مناهيج جـده نـسـل الـمشـايخ مـن مقـاديـم عـنـاز = ستر الهنوف اللي كما البدر خـده سـقـم الحـريـب إلـى حـدا كـل رجـاز = فـوق النضى مجلاسهـم بالأ شـده مـرويـن حـد الـلـي للأ رقـاب جـزاز = ومـن هـازهـم رب الخلايـق يـلـده طيـر السعـد منجـوب من ماكر البـاز = والطيـب جالـه مـن مواريـث بـده ولا الردي لو هو ولـد شـاة الأهـواز = مجـد الجـدود الـلي بـنـوهـا يهـده قـلـتـه ولا نـي لـلـمـخـالـيـق لـمـّـاز = لا شـك مـن شـاف الحقـايـق يعـده * وقال عبدالله بن دهيمش بن عبار العنزي هذه القصيدة يثني على الشيخ انور بن فواز الشعلان مشيداً بكرم اخلاقه وتواضعه : قال الـذي يبـدع إلى طـاب لـه كيـف = البـال يـمـلي والـقـلـم دوم مطـواع اثـني عـلى اللي بالفخر له مواقيـف = فعايـلـه مـا هـي تخاميـن وارمـاع المكرم الـلي عـادتـه يكـرم الضيـف = يـوم البخـيـل لغـالـي المـال جمّـاع لطـف النبا غـيث الكبـود الملاهيـف = مثل الحيا يحيي هـواميـد الأجـذاع عـنـده لمن ضافـه كرامـة وتلطيـف = ينصاه هتـاش الهـواشل إلـى جـاع كريـم سبـلا لعـزوتـه بالمحـل ريـف = إلى هب لهاب الهوا وايبس القـاع معروف فعـله ما يـبي قـول تعريـف = والطيـب والمعـروف للقـدر رفـاع الطيـب حاطـه من جـميع الأطاريـف = ما عاد له من خطة الطيب مطلاع طيبك يا أبـو فـواز مـا جـاك تسليـف = ميـراث جـدك وأنـت للسلـم تـبـّاع نلـتـوه بالمنسف وحشتوه بالسيـف = مـا جـاكـم بحيلة ولا مكـر واخـداع شعلان ساق المجـد لغرير ومنيـف = وسلسـل لعبـداللـه ونايـف وهـزاع واستـلمه النـوري وشالـه بتكـليـف = وتـكـيـلـه نـواف بالـوزن والصـاع ثـم اورثـه فـواز مـهـنـة وتـوظيـف = وصار الفخر تعويد ما بينكـم شـاع وأنـتـم كـذلـك مثـلهـم بالتـواصيـف = رضيعكم يطلـب عـلى المجـد فـزاع تدون غالي الروح عن كلمة الحيف = لـو كـان عـنـكم دونهـا حـال منـاع عنيت ابي شوفـك محبة وتشريـف = ما مقصدي رفدة ولا دور الأطماع ولا قـلت مدحي لـك تملـق وتزييـف = لا شك علمك بالفخر ملي الأسماع مـدح الـذي شرواك مابـه تحـاسيف = تدرك من علوم الفخر كل الأنـواع المـدح مـا يرهـم لبعـض الهـذاليـف = الـلي تدنـوا للردى وسلمهم ضـاع * وقال عبدالله بن دهيمش بن عبار العنزي هذه القصيدة يثني على الشيخ انور بن فواز الشعلان ويسند على غصاب أبو رعد : بـديـت واسنـدت القـوافـي لغـصـاب = منظـوم قافـي فـاض صافي مجمـه أبو رعد يثني على الشيخ باعجـاب = عنـده وفـاء وعـنده شهامة وذمـه الـوايلي مـا هـي غـريبه إلـى طـاب = الـطـيـب مـن جـده وخـالـه وعـمـه ماله عن الطولات والطيـب مجنـاب = مجـد الجـدود الـلي فخـرهـم يتمـه مجـناه أبن شعـلان والعـرق جـذاب = تـشهـد لـهـم بـالـطـايلـة كـل الأمـه مجـده تسلسل من مـناعـيـر شيّـاب = يجـري فخـرهـم فـي شـرايين دمـه المرعضي ساسه معـرب بالأنساب = قـدره كـبـيـر ومسكـنـه راس قـمـه الوايـلي يصعـد عـلى راس مرقـاب = يـوم المـراجـل فـاز بـه مـن يخمـه جده وأبوه إلى اعتلوا علط الأرقاب = كـتـر الجـمـوع خلافـهـم مـدلهـمـه إلـى مشوا معهـم هـل القـود تنساب = صافـيـن مـابهـم الـردي والمخمـه تـرعـابـه العـليـا زماليـق الأعشـاب = ورد الفـياض الـلي عـبيـره تشمـه انـور فعولـه مـالهـا عـدد واحسـاب = من طيـب فعـله مـا تجـد من يذمـه المكـرم الـلي عـادتـه يفـتـح الـبـاب = ومن يشتكي جور الزمن سار يمـه ما مل من كثر المشاغل والأوجـاب = يـرفع مـقـامـه عـن كـلام الـمـذمـه مـا يستمـع منطـوق حاقـد ومغتـاب = الـلـي كـلامـه بـس غـيـبـه ونـمــه ولا هـو زبـون لكـل فـاسد ونصـاب = اذنـه عـن اقـوال الفواحش يصمـه يروم عسرات المراجـل وهو شـاب = عـن الفخـر مـا حـط راسـه بـكـمـه عزيـز شان وحاش رزقه بالأتعـاب = ودنـيـا الغـرور الفـانـيـه ما تهـمـه مـن دون ربـعــه دوم للجـاه جـلاب = جـاهـه يحـل المعـضـلات المـطـمـه انـور ملاذ الملتجي ريف الأصحاب = يجـهـد يـبي شـمـل الـرفاقـه يلـمـه ما خص بالمعروف دانين الأ قـراب = لـكـن بـطـيـبـه كــل وايــل يـعــمـه البـاسـل الشغمـوم نطـاح الأصعـاب = يعـبـأ لعسيـرات الأمـور الـمـهـمـه أمـا الكـرم جـوده كما غيث سحّـاب = مـن جـود كـفـه مـا تـمـكـن يضمـه بـالـبـر والإحـسـان لـلـمـال وهــاب = يا مـا جلا عن صاحب العسر غمـه وأن كـان ودك تفتخر عند الأجنـاب = اعـرض مجـالـه بالمجالس وسمّـه ولا هو من اللي غرهم كبر الألغاب = يـفـداه مـن زومـه بـصـدره يـزمــه الـلـي يـزوم وبـالـمـلازيـم مـا ثــاب = وامـجـاد جـده طـشـهـا بـالـمـقـمـه قـلـتـه ولا نـي لـلأ جـاويـد سـبــاب = اسـب من شال الخـزاء فـي معـمـه واللي يقول الحق والصدق ما خاب = نظهـر ثناء راعي الفخـر ما ندمـه * وقال عبدالله بن عبار هذه القصيدة بالشيخ النوري بن فواز الشعلان بمناسبة اطلاق عدد من السجناء بوجاهته : زان المجـال وصـار للقـول ماجـوب = ونويت اساهم في مجال اختصاصي امدح جناب اللي مديحه على صوب = ومدح الرجـال بدون فعـل انتقـاصي النـوري الـفـواز بـالـفـعـل مـنجـوب = زبـن الـدخـيـل وملـتجـأ كـل نـاصـي عـوايـد الـنـوري إلـى جـاه مـنيـوب = عـانـيه يـبشـر بـالـفـرج والخلاصي من لاذبه لو هو على العمر مطلوب = يطلق صراحـه لـو عـليه القصاصي الوايلي مـن روس عـنـاز محسـوب = عـلمـه يشـرف عـنـد دانـي وقاصي ما هـو عشير لكـل من فيـه شاذوب = ولا هـو لعـفـنيـن المشاور ايقاصي حيثـه شجاع وجـانبـه دوم مرهـوب = يرهب عدوه يوم ضرب الرصاصي كل ما ينال مـن الفخـر يطلب النـوب = مخلص وعـنـده للقـبـيـلـة اخلاصي مثل الجبل يذري عن البرد والشوب = وبـالـعـز ربـعـه رافعـيـن النـواصي عذروب النوري كان به عد عذروب = سـم عـلى كـبـد الـمعـادي ايماصـي عـلى عـدوه كـنـه الـشـري بالـكـوب = وللصاحب احلا من العسل بالقلاصي الـوايـلي مـن صـلب فـواز منسـوب = مـا داس عـيب ولا مشى بالمعاصي امـجـاد جـده بـالـسـجـلات مـكـتـوب = ما اظن يحصى سابق المجد حاصي ودرب المفاخر لـه مسارات ودروب = لا شك من دونه عراض الشواصي رامـه ولـد فـواز لـو كـان مـهـيــوب = ياخذ عـلى المجـد التليـد احتراصي الـحـر وكـره بـالـعـلا دوم منـصـوب = والكوخ مأوى حاضيات الصواصي ومن يتـرك الماجـوب لا بـد مسبوب = ولا تنفع الهقـوات هـي والخراصي * وقال عبدالله بن عبار هذه القصيدة يثني على الشيخ النوري بن فواز : يا قـلم سجـل عـلى صفاح السجلـه = اكـتـب المـكـتـوب وابـده بـالـتحـيـه مـدح أبـو دحـام خـطـه بـالـمـجـلـه = الـثـنـاء يـسـتـاهـلــه زبـن الـونـيـه دون تـمـجـيـدي افـعـالـه يشـهـدلـه = شيخ من صلـب الشيـوخ العدمليـه حـشـت كـل الـمـرجلـه دقـه وجـلـه = ويـوم اشـيـد بفعـلكـم واجـب عليـه والـسـمـوحـة كـان بـالمنظـوم زلـه = قـلـتهـا يـا شـيـخ واقـبـلـهـا هـديـه يـا سمي الـلي يـروس رويـل كـلـه = جـد أبـوك اللي أنت مثـله بالحميـه مـن وكـر هـزاع مـنـزالـه بـتـلــــه = راس عيطـا ما نـزل وسـط الهبـيـه جـدك الـشـغـمـوم للعــداوان عـلـه = ماضي التـاريـخ يضـرب لـه تحيـه الـفـخـر والـمـجـد طـاروقـه تـدلــه = مجـدكـم مـوروث مـا اخـذتـه حذيـه مـجــد جــده مـن قـديـم امـعـقـبـلـه = عـقـبــه فــواز لـلـنــوري حــلــيــه اشـهــد أنـك بـالـمـراجــل جــايـلــه = طيـر شلـوى مـن مواكـر صيرميـه سـاطـي وبـاتع ولا اتعـرف المـذلـه = مـا تهـاب الخصـم واسبـاب المنيـه وأنـت عـقـد المعـضله تنـدب لحلـه = يـوم خطـو اللاش مـا ينفـع خـويـه وأن سنح ظرف المراجل تستغـلـه = بـالـجـهـد والـجـاه حـليـت القـضيـه لا نصـاك الـلي اشتكى ظيم ومملـه = مـا اعـتـذرت وقـلـت مالي مقدريـه تحتفـي بـه والحـواجـب مسفـهـلـه = وتبـدي الترحيـب فـي نفسٍ رضيـه من شرح لك عن سجينه قـلت قلـه = بـشـره يـطـلع ولـو جـرمـه خـطيـه وانـثـنـا يـدعـي الكـريـم ويـبـتهـلـه = دعــوتـه يـحـفـظـك خـلاق الـبـريـه كـم شـيـخٍ رام فـعـلـك مـا حـصـلــه = اعـتـفـر يـبي الفخـر واخلـف نويـه مـن تـكـاسـل عـن لـزومـه فـدوتلـه = نشمـت الـلي شوفـته صارت دنيـه مـا نـفـع منيـوب لـو جـاه بـمـحـلـه = مسلـك الـطـولات مـالـه بـه دعـيـه ساكـن ومـرتـاح فـي مشـراق فـلـه = قـد حالـه عـاش فـي عيشـه هـنيـه وأن نـخـيـتـه لـلـقـرابـة قـال خـلــه = مـا لـنـا مـقـدور والـعــلـة خـفــيــه مـا قـضى لا زم ولا يـنفعـك ل لـلـه = ولا ايـحـامـي دون ربـعـه قـيـدنـيـه مـن تـفـاخـر بالسنيـن المضمحـلـه = مـا تــفــيـده كـان شـوفـاتــه رديــه مـن تسـمـى شيـخ يـنـفـع لا بـتـلـه = كـيـف شـيـخ ولا يـحـامـي للسـميـه كـان مطـلـوب الرفـاقـة مـا وصـلـه = شيخـتـه مـا غـيـر نبـقـه بـالهـويـه جعـل قـصـرٍ مـا يـكـن الـربـع ظـلـه = يا عـسى تـالـيـه سـهلـه جـرهـديـه جـعــل مـا قـال السـديـري جـاريـلـه = عـسى تـقضـه صـواعـق وبـرديـه * وقال عبد الله بن عبار العنزي هذه القصيدة يسند على خلف بن زعل الصلهام العنزي ويثني على الشيخ النوري بن فواز الشعلان : سميت بسـم اللي لـه الخـلـق صـيـام = يرجون عـفـوه دوم سجّـاد وركـوع وبديـت نظـم القاف مـن لـب الإفهـام = فيض القريحـة من نقاريح يـنبــوع نفح المشاعـر صوغها فهـم وإلهـام = وفن القريض بجوهر الفكرمصنوع والقصد ما يخفى على الشاعر الفـام = السد باح وهيّض الجـاش موضوع حاولـت اكنـه والضرورة لهـا احكـام = كشف المغطى بسلم الجواد ممنوع لا شــك فـي مـنهــج تـعـاليم الإسلام = الذود عن حـد الحمى حـق مشروع حسّـان ابـن ثابـت تصـّدى للأخـصام = كافح وعدوان النبي صاعهم صوع شـذرة لسـانـه كـنـهـا شـذرة حســام = رد الهجاء ومن سيّد الخلق مدفوع مـا هـمـنا مـن ذمـنا يا أبـن صـلهـام = لـو طـال حبـل الكـذب لابـد مقـطوع مـا ضـرنـا تـلفـيـق هـلبـاج واخـمـام = لو قال ما قـولـه مصّدق ومسموع يـا مـا سـمعـنـا مـن هـرابـيـد حـّـوام = ويا ما سكتنا عـن هـذاريـم منـزوع الـخـائـب الــلي بـالـديـاويـن عـّــذام = طاشت سهومه والهدف بعد ميقوع الـحـاقـد الــلي صـال بالكـذب هجّـام = شين الضمير بقـلبـه الحقـد مزروع الــلي لعـرض الـغـافـل الغـار شّـتـام = جلاب حظه بارخص السعـر مبيوع وش عـاد فـاد مـرّوج الـهـرج نـمّـام = يـدور بـالغـيـبـة مـصالـح ومنفـوع يـبحـث عـن الغـرات والـقصـد هـّدام = صابـه كمد قـلبه من الحقـد ملقـوع راعـي البلايس طـاح حـظـه ولا قـام = اصبح قـناعه كاشف الستر مجلوع وأظــن مـا حـصّـل مـرامـه ولـو زام = يعـود مثل اللي على الوجه مقموع من فضل والي العرش ملجوم بلجام = ما يـبلغ المقصود لو يشخف الكوع المنسعـر بـالغـلث لـه عـوق واكعـام = حيـث الحنش نابه عن السم مقلوع ونـقـل الكلام لشمـل الأ قـراب قسّـام = يـا مـا ويـا ما فـّرق نزول وانجـوع حكي النقـيلي سوس يفتك بالأجسام = مبـطي لـك الله للـمخـالـيـق راثــوع والـلي زعـل مـن مدحنـا لـبـو دحـام = يـفـعـل فعايـل طائـل الشـبر والبـوع شـفع لـربعـه يـوم حكمـوا بـالإعـدام = وافـرح عوائلهم عقب نوح ودموع ابـي امـدح الـنـوري ولا اطـيع لـوام = بـه نفتخر والقول بالصدق مشفوع عـلم الـفخـر يسـتـاهـله كل ضرغـام = سلايـل اللي لبسهـم طـوس ودروع راس العرب بـالمعـضلة موقفـه هام = ما يخـتفـي مقـدم طوابـيـر وجـموع والـلي جـداه النوم عـن واجـبـه نـام = خـلـه بـراحـة بـال ورقـود وهجـوع والـيـوم حـنـا بـزود خيـرات وانعـام = نـنعـم بحكم الحـق والشمل مجمـوع الحـمـد لله جـت عـلى خـيـر ما يـرام = زال وتبـدد واهس الخوف والـروع نمشي على وضح النقا نشمخ الهام = نسلك طـريق العـز والراس مرفوع عـند الـكرام إكـرام وإعــزاز وحشام = والحـر مـا يقبـل مذلـه ولا اخضوع الـحــر مـا يـصـبـر عـلـى ظـلم ظّـلام = والجـور ما ينطـاق والحـق متبـوع تـلاشـت الأوبـاش وانـصاب الأ زلام = دورالجهل والظلم ما يرجع رجـوع وبعض الرموز الباليـه مثـل الأصنام = يـغـتـر فيـهــا كـل جـاهـل ومخدوع والــلي يــغـــرنــه خـيـالات الأوهـام = سلم الغـرور بخاطره صـار مطبوع مـتكبـر ويـفخـر عـلى الناس بعظـام = يبى الصعب ينقاد له بالرسن طـوع كـن الـبـشـر عــنـده مـوالـي وخـدّام = ما تقـل فـي آدم لهـا جـذوع وفروع وده يــدوس الخـلــق كـلـه بـالأقـدام = ما يدري الـدنيـا بهـا نـزول وطلوع مايفتكر وش صار مع شاة الأعجام =غادر بلد جده عن العـرش مخـلـوع يـوم الـتجأ مطرود عن ديرته شـام = عاف العـذارى والعـماهيج والخوع نـعــوذ بـالـلـه مـن تـقـالـيـب الأيــام = دايـم تـقـلب كــل حــزة عـلـى نــوع دنـيــا الـغـثـا تـشبـه تمـاثيـل الأفلام = من هرّفت له يوم تطوي له اسبـوع يــوم بـهـا تـصبح عـماليـق الأقـزام = ويوم الشناح الهيلعي صار مربـوع يوم بها تسمر عـلى صوت الأ نغـام = ويـوم تبات من الغضب تقل مفجوع احـيـان يـدفــق فـائض الـزاد بـدرام = واحيان يشوون القدايـد من الجـوع احـيـان تـلبـس شـال واشماغ بسّـام = واحيان مـا تملك على ثـوب مرقوع أن سانعـت لـك ترتـدي فـاخر الخـام = وأن عاضبت تلبس درافيل وارثوع عـصر الفرح والكيف والبسط ما دام = لابد مـا تشـرب مـن الـمـر قرطوع والخـاتـمــه صـلـوا عـلى خير الآنـام = اللي جعل مبنى هل الشرك مقشوع هذه القصيـــــــدة التي هي من نـــــوع الهجيني والذي اعجبنــــــي بالقصيدة جـــزالة الفــــــاظها وهي لااحـــد مـــوالي اســـرة الشـــعلان ويـــدعى غـريب مطـلق الشبيبـــة هي بالشيخ نـــــواف الفـواز نواف النوري الشعـــلان.... يـــــــاونتـــــي ونــــــة المقــــــهور***********وأصبـــــــــر على الظيـــــــم والباســــــي دنيــــانــا كل مالهــــــا بحــــدور************غـــــــدت لاابو (كـــريك)والفـــــــاســـــي غـــــدا بها الغــــــانم المسطــــور***********تبــــيّحــــت لـلــــــردي الخـــــــــــــاســــي تغـــــــيّر دور وجــــانـــــا دور************ وقـــــــــت علينــــــــــا غـــــدا قـــــــاســـــي وقـــت الدجــــاجة تصيد نسور************والـــــــذيب مســــــــكيــــن محتــــــــــاســـــي يادار عــــلامك غديتـــي قبور************وانـــــــــا بنيتـــــك على ســــــــــــــاســــــــــي يادار من اول اهـــلك صقــور************والــــيوم صـــــــــرتي لقــــســـقـــــــاســـــــــي يـــادار عينتـي صليب الشــور*********** اللــــــي كســـــب كــــــل نــومــــــاســـــــــي فـعل اخـو فــوزه نشربسـطور***********مـــــعزتن فـــــــــــوق ياجـــــــــلاســـــــــــي من وراء الجـوبة لاابوالقــور**********قــــــــــلاطـــ ــنــــا دوم عســــــــــاســــــــــــــي يامــا حقــلنـا ورى المظهور*********** ولا همـــنــــا كــــــــــــــل فــــــرّاســـــــــــــــي ولا همـنـا سـكنـتن بقصور*********** لعــــليا اللـــــــي ترفــــــــع الراســـــــــــــــــــــي وصـلاة ربي على المذكور********** النبـــــــــــــي بالحــــــــق مـــتواســــــــــــــــــي شعر الأمير محمد بن أحمد السديري رحمه الله قالها بالشيخ أورنس بن طراد السطام الشعلان رحمه الله : يـسـقـيـك يـا دار شـمـالـي عـنــازه = غرب الولج ياعلي شرق الطريبيل سـقـاك نــو مـمـطـرٍ مـن عــيـــازه = عـلى رغاب القاع فيض من السيل عـز الـلـه أنـه راح فـيـهـا جــنــازه = صميدع توصف عـليـه الـرجاجيـل لـه فـي عـازات ولـي فــيـه عـــازه = بوقت الزوم إذا حصل بالزمن ميل مـا الـوم قـلـبي لـو يـزيـد اهـتـزازه = وجر الونين وشاف ظيم وغـرابيل وعـيـني كـمـا شـن تـفـتـق اخـرازه = عـلـيـه دمـعـات المحاجـر همـاليـل حـرٍ جـزع وأدمـا بـقـلـبــه حــزازه = وتـفجـرت شعـبـان قـلـبـه مبـاهيـل قـلـبـه مـن الـفـولاذ مـا هـو قـزازه = والغيض قـد فجـر قلوب المغـالـيـل وأن داخـل الشردان رعـب ونـزازه = الـذل مـا يـلـقـا عـلـيـه الـمـداخـيـل تقـصـر يـميـن الـلـي بـالأيـام هـازه = يـرجـع ذلـيـل وفاقـد العـقـل بهليـل الـيـا لــمـح ضـده ثـقـيــل مــــرازه = أخـو محمد صـافي الـذهـن حلحيـل مـن شبتـه يـا مـا قـطع مـن مفـازه == ويا ما ضهر من غـرقـة كنها الليل رقـى سـنـام المجـد والطيـب حـازه == وبـيتـه لعصمان الشوارب مداهيـل هـزيـم حـطـوا حـفـرتـه بـالعــزازه == براس الطويله وارفع القبر بالحيـل ومـن الذهـب حطـوا لقبـره اركـازه == ومـن صافي النيروز حطوا قناديل حـتـى يـجـيـه الـلـي بـعـيـد مـنـازه = ويلقـا بـقـربـه شمخ القـود والحيـل اعـتـضـت بـه ربـع لقـلـبي لـهـازه = أعـني هـل العـليـا قـروم المشاكيـل عـلمي إلـى جـاهـم سـريـع نـجـازه = وأنـا لهـم دايـم عـلى العدل والميـل هـم فـزعت المظيـوم وهـم جهـازه == وبالفعـل للشعلان تشهد هـل الخيـل شـعـلان فـيهـم بـالحـرايـب افـيـازه = بجـدع المـدرع فـوق قـب مشاويـل ربـع حـمـاهـم مـا يـقـرب احـجـازه = وعـدوهـم اسـقـوه ويـل بـاثـر ويـل أن حـل ضـرب مخـلـص بـالـبـرازه ===أرووا حـدود سيوف حـدب مناحيل أحـدٍ يحوش الطيب غصـب حـزازه ==== وناس عن العـليا ضعاف مهـازيـل يبيـن لـك فـرق الـذهـب مـن بـيـازه == فرق بعيد أبعـد من الجدي لسهيـل البيض ترضع لـيـن تـيـبس غـرازه ===وبـالألـف يطـلع واحـدٍ بـه تـنافـيـل تـاخـذ رفـيـعـيـن الـمـبـانـي ابـزازه = يا ليـتهـا تـعـتـاض عـنهـم تـبـاديـل أن قـيـل قـلـبـك مصخـرٍ بانـحـيـازه قـلت الوفاء لـه وسط قـلبي مثاقيل وأنا احمد الـلـه ما حضرني خـرازه == واردون ثـوبي ضافيات ومضاليـل يـسـقـيـك يـا دار شـمـالـي عـنــازه = مـزن مـن المنشأ ركـونـه مخايـيـل قصيدة الشاعر ابن قويفل من شمر في الشعلان وعموم الرولة مادحا : يامزنة غرا تقافى رعدها تمطر على دار الدريعي ونايف خله على الوديان تذهب ولدها بديار مكدين المهارالعسايف تملا الخباري للدريعي يردها بقطعان عجلات على الما زهايف ياذيب ياشاك من الجوع عدها كان انت لرماح الشعالين ضايف تلقى العشا صفرا صخيف جسدها من كف ستر معطرات العطايف وكم سابق بالكف عاقوا جهدها مضرابها بالجوف ماهو مسايف من كف شغموم ورد من هددها أو شايب شيبه من الخيل هايف كم قالة قفوا بها من بعدها راح يتولاها الدريعي ونايف حالوا وراها ودونها هم لددها وقد عوضوا طلابها بالحسايف تنشبت محد يحلل عقدها ومن دونها يروون بيض الرهايف ثم قال فيهم أيضا ابن قويفل هذه القصيدة وذكرهم جميعا: اللي يكفون الشوارب بالأيمان هبيت ياحظ تنحيت عنهم أقفيت عن ربعك عيال ابن شعلان اللي كما شل الروايا طعنهم ماينتخون إلأ بعليا وعليان وإن حل ضرب مخلص جيز منهم لباسة عند المظاهير شيلان صديق عينك مايطيح بحظنهم نزل الخلا ماهم فراقين سكسان ماسقسقوا للعنز تتبع ظعنهم قطعانهم وان شرقت تقل غزلان ون غربت مثل البرد هاك عنهم القلب ماينسى طويلين الأيمان اللي يقزون العدو عن وطنهم ويقول الشاعر المعروف بصري الوضيحي متمنيا : أبا تمنى كان هي بالتماني صفرا صهاة اللون قبا طليعي وسروال تومان ومثل الشطاني ومصقل مثل الثغب له لميعي أبي ليا لحق الطلب له غواني والخيل معها [مجول]و [الدريعي] أردها وان كان ربي هداني من المعرقه ياتي على الخد ريعي أردها لعيون صافي الثماني بيض النحور مهلكات الرضيعي قدام شمر مثل زمل الصخاني اللي يخلون المخالف يطيعي وتقول الشمرية التي عشقت أحد أبناء الرولة الذين جاوروا قومها : إن شرقوا جانا الموت وان غربوا ياويلي لا عاد أنا من شمر وش ولعن برويلي قصيدة لعبدالله بن عباس بن دكنان الشعلان في نسب أسرة الشعلان مشايخ الرولة يقول : مـبــداي بـالـرحـمـن ربٍ وحـيــدي --------------------- خـلاق سبعٍ عـالـيـه دون عـمـدان ومـن بعـد ذلـك نبـتـدي بالقصيـدي -------------------- ولانـي عـلى نظم التماثيل شفقـان لاشـك أنـا مـن واجـبي يا عضيدي --------------------- قصدي أسجل شجرة لنسل شعلان مـتـحـري الـدقـة بـكـل اتـعــديــدي --------------------- عـن قولـةٍ بالشرح قاصر وطولان شعـلان عـقـب سـبـعـةٍ بـتـحـديـدي ----------- --------- غـريـر ودقـيـة وجـابـر وروضـان وعـيـالـه البـاقـيـن جعـلـك تـفـيـدي --------------------- سالـم ومعـه فنيخ وأيضـاً سليمان وغـريـر ابـو عشره وميـة حفيـدي ------------------------عـقب ابـطـالٍ باللـقـا شانهم شـان منيـف ومعـبـهـل وأيـضـاً هـنـيـدي ------------------ وصبيح وبـنـيـه ومعـهـم شبيعـان ومنيف شيخ رويل باسـه شـديـدي ---------------------- شيخ لعموم رويل من قدم الأزمان مـن عيالـه عبدالله ولا هو وحيـدي ----------------------معـه جبـل والنعـم والله بالأخـوان وعـيـال عبـدالـلـه رجـال الحميـدي ---------------------- نـايــف ومـجــول مـع زيــد الآذان خيـولهـم عـن الخـطـر مـا تحـيـدي -------------------- أبطـال نسـل أبطـال تـاريخهم بـان نايف يروس رويـل رايـه سـديـدي ---------------------- صـاروا مواريثه مشايخ وشجعان فيصـل ومعـه هـزاع مع الحفيـدي ----------------------سـطـام لـطـام الـعـدا يــوم الأكـوان وعـيـال جبـل هــم خـزام العـنيـدي ---------------------- وجبـل عـيالـه نجـم أيضـاً ودكنـان ولا الـدريعي راح عـلـمـه بعـيـدي --------------------- لا سار يتلونـه على الخيـل فرسـان لعيـون حصـه مـا نطيحـه سعيـدي ---------------------- والخيـل ما تلاه مهـرة ولا حصـان لعيـون حصه مـا يعـيش الـولـيـدي ----------------------عـافـوه لـو أنـه سـلايـل كـحـيـلان نايف والدريعي ذكـرهـم مـا يبيـدي -----------------------شعـار شـمـر مـجـدوهـم بـقـيـفـان ومجول مـن الفرسان فعـله فريـدي ----------------------- زيزوم ربعه يوم روغات الأذهان وشـجـرة نسبـنـا جعـلهـا للمـزيـدي ---------------------- نفخر بها مـن دور وايـل إلى الآن وغـايــة رجـايـه أن قـولي يـفيـدي -----------------------ولف لنا الصايغ وموزل ورضوان ومـولـفـيـن مـن زمـان بـعــيــــدي ----------------------ولـف لـنـا ولـيـم ولا قـال بـهـتــان وصلاة ربـي عـدد رمـل الصعيـدي ------------------------عـلى النبي الهاشمي نسل عدنـان تقبلو تحياتي ( عبدالرحمن اليمني )

Powered by vBulletin® Version 3.8.7
Copyright ©2000 - 2025, Jelsoft Enterprises Ltd
شركة استضافة: استضافة رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه