بسم الله الذي لايضر مع اسمه شيء ..



أحبتي ..

كل عام وانتم بخيـر ..
وكل عام وبكم الأعياد أجمل ..


جديده .. لها شرف مروركم واطلاعكم ..


صلوا على النبي ..



بالصــوت:


للحفظ..

هلابك .. كثر ماكنت ارتجيك .. وكنت بك مغرور = هلابك .. كثر ماصاب البَخَتْ حزني .. ولا صابك
هلابك كثر تقليب المواجع .. والسهر .. والجـور = كثر مازارني وجه الفراق .. بوحشة غيابك
هلابك .. كثر ماكنت المدائن .. والشُرف .. والدور = كثر ماملّت يدين انتظاري.. تطرق ابوابك
هلابك .. من ثلاث سنين .. أرددها بدون شعور = ليا حلّ المسآ .. قلت المسا جابك.. ولا جابك
علامك ؟؟ علّ ماقلبك حزين .. وخاطرك مكسور = عسى ماضاق بك صدر الزمان .. وسهّر اهدابك ؟
علامك ؟؟ جيت في بالك ..؟ صحيح تحس بي ؟ مشكوور = وربي ماهقيت ان الزمن يصحى .. ويصحى بك
ثلاث سنين .. ملّيت الوجيه .. وضحكة المقهور = اقول اني سليت .. ولا سليت الا عن عتـابك
ثلاث سنين .. والاشواق في صدري عليك تفور = تهيضها الهدايا .. والقصيد .. وباقي اطيابـك
ثلاث سنين .. وطيوفك كريمه بالوهم .. والزور = تصوّرك بعيوني كل ماشوقي تغنّابـك
ثلاث سنين .. اجي نفس المكان .. الموحش المهجور = اثر حتى الاماكن ماتزين الا مع احبـابك ؟!
واثر من حبّ ماينسى ؟! واثر قاع الامانـي بور ؟! = واثر لو هابتـك كل الرجال .. الحب ماهابـك ؟!
حبيبي وفـّر اعذارك .. قبل ماتعتذر معذور = ترى قلبٍ عنالك .. مايضره لو تعنـّـا بك
هلابك خل كل اللي مضى واقرب .. وشب النور = بقلبٍ يشعل شموعك .. سنين .. ولا تهنـّـابك

هلابك .. كثر ماكنت ارتجيك .. وكنت بك مغرور=هلابك .. كثر ماصاب البَخَتْ حزني .. ولا صابك
هلابك كثر تقليب المواجع .. والسهر .. والجور=كثر مازارني وجه الفراق .. بوحشة غيابك
هلابك .. كثر ماكنت المدائن .. والشُرف .. والدور=كثر ماملّت يدين انتظاري.. تطرق ابوابك
هلابك .. من ثلاث سنين .. أرددها بدون شعور=ليا حلّ المسآ .. قلت المسا جابك.. ولا جابك

وانت يا عبدالعزيز الدهمشي هلا بك مليون وهلا بهذا الابداع الرائع الذي يدل على قدوم شاعر متمكن ..

الف صح لسانك وسلم بوحك الشجي يا عبدالعزيز ..

تحياتي لك وبانتظار ابداعاتك القادمة ..