يومي طفل .. كانت توصيني أمي = يا وليدي انحش عن مراح البعارين
ومن يومها ما غير أهوجس .. وأسمي = أخاف من سطوة خباث الشياطينن
وكانك تشيل الهم .. ياكبر همي = بس القضية .. ياصديقي وبعدين ؟
النية الشينة تجي بس يمي = والنية الزينة .. نصيب البعيدين
أبك أنت ثابت في شرايين دمي = مهو كلامي .. ذا كلام الشرايين
( برك ) فضا روحي وماردك ( يمي ) = يعني .. ترانا روح .. تمشي بروحين
وأنا كلامي جرح . . وقعه يدمي = وقعه يأثر في جميع الموازين
وغيري كلامه لو غلط .. ما يهمي = نقعد ندوّر له عذر .. مستميتين
وخيري لغيري لو تجرعت سمي = أدري خطا .. بس الخطا جاني منين ؟
كلي غلط .. ماطاي .. راسي .. لكمي = وأنت الصحيح اللي من الزين للزين
لكن تعال أقول لك وأنت عمي = لا تشوفني في عين .. وتغمض بعين
وش فيك جيت تزيد همي وغمي ؟ = وتزيد جرح أخوك .. يا أخوك جرحين
ولوكنت أخوي اللي رضع من حشا أمي = ما كنت أعزك مثل ما أعزك الحين