من منبر الشوق ترسل لك عناويني=تقدير وافر بكل احساس قدمته
يااصدق الحلم تدري كيف ترضيني=تعطيني الشوق في فنه وترجمته
في فعل صادق بردة فعل تكفيني=وتوقف الهاجس اللي زج همهمته
ان كان تبغى تشوف اللي بقى فيني=من صبر صامد تكسر ثم لملمته
تعال وافحص خفوقي مع شراييني=تستكشف انك دميت الجسم واجحمته
انا اشهد انك تحمَل مايعنييني=وانك بايدك دفنت القلب واعدمته
وش بك تغلى ونار الشوق تكويني= وانا خفوقي لنار الحزن سلمته
ماتعلم الغيب وانا الغيب يخفيني=لو اعلم الغيب حلمي ماتحلمته
لاشفت حالي تشوف الحزن في عيني= علمت قلبي يجر الآه علمته
لعل اهات قلبي هي تداويني=واترجم الحزن وانا ماتكلمته
كان الامل في مشاويري يخاويني=كنت ارسمه شي واقع ما تكتمته
لين ابتدا باخر المشوار يغويني=ويصغر بعيني بسرعه يوم ساومته
ورجع بنصف المسافه صار يشقيني=وانا رجعت لمساري يوم داومته
انا ادري انك لوافي الحب ترجيني=وانا وفيتك جفاك المر قاومته
من شان عينك رضيت الهم يأويني=وكتمت حزني بوسط القلب قسمته
بذلت جهدي على ماكنت تعطيني=وجاهدت عقلي على الصعبه ولجمته
شف كيف بس بعطاك اتكون تحييني=اشلون لاجيت في جوي وغممته
لاجيت تشرق وتفرحني وتضويني=ولارحت جوي تعتم وانت عتمته
ماعاد ابا اسرد دلايل مع براهيني=واثبت لك اني احبك والغلا همته
الهاجس اللي كتبه مع عناويني=يحكي عن الشوق وقافي ماتلعثمته