°~*¤®§(§ شبـــكة ويــلان العـربـيـه §)§®¤*~ˆ° - { الشـــــــــــــــــــــات}

- منتدى المختارات الشعريه (http://www.weelan.com/vb/forumdisplay.php?f=10)

- - { الشـــــــــــــــــــــات} (http://www.weelan.com/vb/showthread.php?t=14138)

{ الشـــــــــــــــــــــات}

الشاعر .......مبارك الخليفه
احدث قصيده توّها مـا بعـد جـات=اصبر شوي اغنـي احـدث قصيـده

رسالتك جتني وانـا اتابـع الشـات=ابغـي رفيـقٍٍ لـي ديـاره بعيـده

يدرس بلندن قد لـه اربـع سنـوات=وما عرف جوّاله ولا اعـرف بريـده

وقالوا لي انه يدخل الشات ساعـات=واسمه جبل وانشـد وتلقـاه سيـده

ودخلت اشوف الشات و العالم اشتات=الحكـي واجـد والاسامـي عديـده

الزيـر واسامـه وياسـر عرفـات=واصالـه وهيفـاء ونيلـه وعيـده

مخلطه مـا بيـن كـل الحضـارات=وكـلٍ علـى ليـلاه ينشـد نشيـده

وبرب تيت وباك هوتميـل دوت آت=وهذا يصيد وذيـك تبغـي تصيـده

سوالف وحـب وغـرام وعلاقـات=و ورود واهدائـات اغانـي جديـده

تلقى الشبـاب الاف عنـد البنيـات=وكـلٍ يطـرّد فالطـرايـد طـريـده

وبعض الشباب يغيّر النـك بسكـات=اسمه فريد وبعـد ساعـه فريـده

والبنت زهقانـه ولا فيـه طلعـات=وجوّالهـا فضـا وكمّـل رصـيـده

تدخل و تستعرض وتعمـل حركـات=ولا بـد مـا تلقـى صبـي ٍ وليـده

يعبي الجوّال فـي ظـرف لحظـات=ويحقـق لهـا كـل ماهـي تريـده

جوٍ مكهـرب فيـه كـل الحكايـات=وكلٍ يدوّر كسب يمنـاه ب ايـده

ومطوع ٍ ينصـح باحاديـت وآيـات=ويقـول تكفـون المصيبـه شديـده

لكن خلق الله في حسـاب الامـوات=لا عيب يردعهم ولا أيـة عقيـده

يا عالم اصحوا واذهنـوا للبزيـرات=وسائـل الترفيـه صـارت مكيـده

ما فيـه رجـل ٍ داري ٍ بالحيـالات=يضغط على بزره ويقـرش حديـده

ويمنعْه من درب الردى والسخافـات=وينبّهـه لـو كـان ماهـوب ميـده

وانا رفيقي راقد الظاهـر او مـات؟؟=عيّا يجي وانا ختمـت القصيـده