اللي عليها الغنج طبق راحتيه = والغنج خصلة تحتوي خصايله
دايم مفضح بي وأنا ما أقول ليه = فضايحه ستر الهموم الجايله
صغير ومدلع ومزيون ونبيه = أخذت لي عامين وأنا احايله
جيته رجل عاقل مع خافق سفيه = ما لوثه دم الحياة الزايله
أنا فدى الغمازتين بوجنتيه = وذآبح قلبي وآ كبرغلايله
والموت لا سولف وعض بشفتيه = أيقنت بحظوظ العباد المايله
هذا وهو ملقوف وعناده كريه = أليا ركب راسه وقام يشايله
أليا زعل حتى اتصالي ما يبيه = وليا رضي يزعل على موبايله
وان شافني زعلان والخوف يحديه = تشبع الجوال من رسايله
بزر قسم وجه الدلع عشرة وجيه = وتعددت على الدلع فضايله
مدلعه جده برغبة والديه = تدليع جد وتختلف وسايله
وانا الضحيه والبزر ماله شبيه = عنده لرفع الضغط قدره هايله
لا شافني مقبل يسلهم ناظريه = سلهام خبث ونيته متحايله
وان قلت له بشويش شب الله عليه = قام يتكسر واسبلت جدايله
وسمعته يتمتم ويشر لي بيديه = والله لا اطلع لك نجوم القايله
دلوع ما همه وانا مجبور فيه = ومسامحه مهما تكن عمايله
دامه يعرف اني على اية حال ابيه = وشلون الومه واتقي حبايله
حفيت سبايتّ القدم منه وليه = ما غير اقابل بيتهم واخايله
وانا على شان اجيه لافكرت اجيه = صاحبت من شانه جميع العايله