يالله ياللي للمخاليق موجد = يالواحد اللي كل حي(ن) دعاله
يالمعتلي مالك من اصنافها ند = انت الوحيد اللي فريد(ن) كماله
يامنزل القرآن يا محدد الحد = نطلبك عفوك ياعزيز الجلاله
ومن بعد ذكر اللي كلامه تجدد = ارسل للقرم(ن) مرسللي رساله
من فوق جمس(ن) توه اليوم ورد = صنعه جديد وضامنته الوكاله
جمس(ن) حمر ماركب فوقه الشد = فريد نوعه ما بجيله شداله
مواصفاته كامله مالها عد = تبهر عيون اللي يماري خياله
اربع وخمسه جنبها صفر ينعد = حجم المكينه مارضينا بداله
به البساتم والبواجي تعاند = كل(ن) يقول الطيب هذا مجاله
ليا دق سلفه واشتغل ثم غرد = تغريد اصاله في ليالي صلاله
صاروخ كنه بأسود القار سدد = بعيد مضرابه وصعب(ن) مناله
القير والدفرنس والنور يشهد = أن الذي صممه واسع خياله
امرط شنب بالعلم وحده تفرد = بالبيت الابيض حاكمين(ن) خواله
قم يانديبي للمحرك تفقد = حيثك فهيم(ن) مابطبعك جهاله
ومع طلعت النجمه وقبل الشفق مد = اقضب يمين الخط واترك شماله
ملفاك بيت اللي كما الطير لا هد = حر(ن) بتوع(ن) نادرات(ن) خصاله
حر(ن) بنا بيت(ن) على العز شيد = ومن حدته سود الليالي عناله
قله ترى فكري من الوقت منشد = وحملي ثقيل ولا قدرت احتماله
شفت البشر ياخوك في حال منهد = كل(ن) يسوي مابراسه طراله
رجل(ن) على جاره سلاحه تجند = مايدمح الزلات ويرفا خماله
ورجل(ن) لسانه باسود السم ينقد = عنده على اعراض الخلايق وكاله
واحقاد من بين القرايب توقد = وهذا طرف خيط(ن) ولا ابغى الاطاله
وختامها صلوا عدد من للسماء لد = وعداد من صلى وصام ودعاله
على نبي(ن) ماتوانى وتردد = نفذ كلام الرب والشرك ازاله