انثر على خدي من الدمع وانوح = لين المدامع جف ماهن وباحن
ومشاعري من شان لا صير مفضوح = أكذب على نفسي واقول استراحن
اهدي اعصابي وأنا أفور وافوح = لو فوقي الدله والابريق فاحن
لني فقدت الروح مع توأم الروح = أغلى ثلاثه في حياتي وراحن
راحن وباب القلب للحزن مفتوح = والنوم عن عيني دروبه تناحن
ورثت من مرواحهن عشرة جروح = اسكت وهن سكوت وان صحت صاحن
واليا لزمت الصمت ماودي أبوح = تجردن من صمتهن واستباحن
يال النصيب اللي كتب لي على الوح = علقتهن بين المحاجر وطاحن
طاحن ويوم الظل ميل على الدوح = كن الحمايم في ضلوعي تلاحن
ياكسرة الخاطر وياقصرة الشوح = ضحيتين الحرب والحرب طاحن
قفن عن عيوني بروق لهن ضوح = واتلا العهد في شوفهن عقب لاحن
زينة حياة , ونصف دين , وغذا روح = أغلى ثلاث في حياتي وراحن