لا طالت الطرقة انا شخص معتاد=أصبر واشيل الكايده والعسيره
واليوم شفني يا صحيبي بلا زاد=والصبر ماله في حياتي مسيره
باسباب من عينه كما عين ورًاد=حرٍ وسمًوه الشيوخ الشهيره
والخد برقٍ دون مزنٍ ورعًاد=والريق خمر وله ثنايا صغيره
والعنق عنق الخشف لا ذل ينصاد=والشعر ليل وله نسايم عبيره
والخشم سيف اللي غزا القوم هجًاد=سيفٍ رهيف ولا يداوى كسيره
هذي بعض أوصاف منقوض الاجعاد=واوصاف خلي يابن وايل كثيره
واليوم قل لي يابن الاجواد وش عاد=وش عاد اسوي والمصيبه كبيره ؟ !

يا مرحبا بقافٍ بدى فيه قصًاد=يشدى المهيًل في حشا المستديره
قافه كما كفٍ صفق وجه نقًاد=لا دوًر الهزله ودار المعيره
قرمٍ على بير التماثيل ورًاد=وهدًاج تيما مدفقه من ضميره
جزلٍ بتوع وللتعابير مسناد=والبحر يغرف وارده من غزيره
فعله تبيًن به على روس الاشهاد=ريف الضعيف وللكساير جبيره
يا من كسب تاج المفاخر والامجاد=شبل العرين وباللوازم ذخيره
ياللي سنام الطيب لك فوقه شداد=والطيب مبطي واسمٍ له بعيره
من لابةٍ يحمون بالسيف الاذواد=((غلبا)) لو جموع المعادي غفيره
سبيع تعسف للقا بالوغى جياد=ولا ثار عج الخيل يكعم نظيره
كم خفرةٍ لبست من ثيابها حداد=وكم واحدٍ بالكون حاسو مريره
لهم على حوض المنيًات ميراد=ويروون شذرات السيوف الشطيره
نطًاحة الواجب مناعير واجواد=يدله غريب الدار لا اصبح قصيره
يالصيرمي يا شوق مركوز الانهاد=غروٍ جفول وشوف ظله يذيره
عينه محيط وناعس الطرف سهًاد=واصفى من الما لا ركد في محيره
والخشم سيف اللي على الموت هداد=دوًار ثار ولا طلب شين غيره
وعبد اعتكف ولجمرة النار عبًاد=سكن سنا يرقٍ تواهج نويره
أصبر لو ان الصبر علاًل الاكباد=واللي بغى الحالي صبر للمريره
الصبر يرًث بالمقابيل ميعاد=والا العجل يا صاح مقطوع خيره
ادري البعاد بلايج الصدر وقًاد=وارًث على جوف المفارق سعيره
كم واحدٍ قبلك مع الدرب منقاد=وكم واحدٍ بالحب يشكي خشيره
ما ذاق لا زادٍ ولا ارتاح برقاد=يعاف فيًه ويتوسًد هجيره
وافطن ترى الغايب معه حجه اوكاد=ولابد ما يرجع وعينك بصيره
باكر يعود وعيدكم بالفرح عاد=وكل عام وانت بزود خير وستيره

المشاركة الأصلية كتبت بواسطة منصور الجلعود الصبـر يـرًث بالمقابيـل ميعـاد=والا العجل يا صاح مقطوع خيـره صح لسانك يافايز صوت وصدى قمه رد مملؤ بالحكمه والحنكه بانتظار جديدك القادم باذن الله لك تقديري واعجابي ,

المشاركة الأصلية كتبت بواسطة سعوط المجانين صح لسانك ولاهنت جزل جزل يافايز العبدلي والنعم والله بسبيع الغلبا وعموم القبايل ...

المشاركة الأصلية كتبت بواسطة صالح الجطيلي فايز العبدلي صح الله لسانك قصيده رائعه من شاعر رائع تقبل تحياتي