"إليكم هذه الأبيات عسى أن تنال إعجابكم"
{ علما ً إنني متأكد إن كل واحد فيكم لاحظ هذه الظاهره }

إسمحولي ودي أذكر شي لو ماني مخوّل=ولاحــد يفكــر يقـول فلان يقصدني مقاله
شفت لي حـاجه حقيقه ماهي أقوال ٍ تقوّل=شــي أنا بالعين شفته مــانقول فلان قــاله
يالربع شــاهدت ناس ٍ من تصرفها تهوّل=يتظــاهر بالغناه وحــالتــه من جــد حـاله
يركــب فخـام المــواتر ويتمشى ويتجوّل=مشتريها أقصاد ماهو دافعه من راس ماله
يوم يكـشـخ مظهره مـاكنه إلا من المعوّل=طاول اصحاب السعاده والفخامه والجلاله
يبترم من غيرحاجه بين يركب بين حوّل=ولايشـوف من السمــاء مقدار دايرة البياله
يحسب إنه زايد ٍ فوق البـشر طال وتطوّل=مادراء إنه لو ملك له طايره ماحـد ٍ دراله
بالمظاهر صايرا ً قارون ثاني غير الاوّل=والحقيقه لــو عرفــتـه زين ماعشى عياله
يفعل افعـــال الغناوي بـس فتره مــايطوّل=ما تكلف للرجال إلا ّ الكــلافــه قــد حـاله
والمصيـبـه مايطيعك لــو على مثله تعوّل=مدري بفكره تصرف صح وإلا من هـباله
نجهله وأثر العميل يطارده من عام الاوّل=وأثر أموره كـلهــا ماتمشي إلا بالحــيــاله
يطلب التاجر يبيع وعطني حسابك وأحوّل=يدفع القصدين الاولـى ثم تنقطع الحــواله
ويتماطــل في حـلال الناس يكذب ويتقوّل=مــايصدَق لــو حلف بالله من كـثر احتـياله
وكل يوم ٍ له طلب وإحضار للقاضي محوّل= بالسجن موقوف وإلا طالعا ً تحت الكفــاله
راتــبه مـرهون للشركــات والبنك المموّل=بالشهــر ديركــت يدفع شــيك وإلا كمبـياله
وآخــرتهــا يستغيث الناس يطلب ويتسـوّل=ياعســى مــافالكم ياهل الوفاء والجود فـاله
أذعــن ويسـتــنـجد الــديــان والاول تحـــوّل=يعتبرهـــا لامهـلــه شهــرين سوابه جمـاله
مـاستفــاد من التفــاخـر والتبجح والتجوّل=مادرك إلا فلان مابه خير لامن جاء مجاله
يحسب افعـال الرجــوله بالتـباهي والتزوّل=والمــراجل مــاتجي ياهل المعرفه بالسهاله
قلته ولاني وكيل الناس ولاني مخوّل=لاحد يفكر يقول فلان يقصدني مقاله

المشاركة الأصلية كتبت بواسطة سعد النفج (المشاركة 317809) الراقي / حمد الضوّي .. صدقت و صح لسانك .. بيض الله وجهك على هالنص الجميل و الصادق .. نص يتحدث بصدق عن شخصيات للأسف تحاول معانقة الغنى و هي بحالة يرثالها .. نص اعجبني و تستحق الثناء .. دمت بخير ..

المشاركة الأصلية كتبت بواسطة محمد بن موسى (المشاركة 317837) الشاعر / حمد الضوي صح السانك مدد بلا عدد يالغالي صدقت اخوي كشخه غير .. هذي مشكله وظاهره بكل اسف منتشرة هذة الايام في مجتمعنا وقضية يعاني منها شريحة كبيرة من المجتمع فتجده يقصر على نفسه واهل بيته بس المهم انه يكشخ ويتبجح قدام الناس حتى يقال فلان راكب آخر مديل اخي / حمد نص رائع ومميز يناقش مشكله وظاهره واضحه للعيان استمتعت بقرائتي لهذا النص من بداية القصيدة الى نهايتها تقبل مروري واحترامي

المشاركة الأصلية كتبت بواسطة فهد السلقاوي (المشاركة 317840) شاعر حمد مبدع مبدع مبدع تحياااتي لك ولشموخ الذي انت فيه