°~*¤®§(§ شبـــكة ويــلان العـربـيـه §)§®¤*~ˆ°

°~*¤®§(§ شبـــكة ويــلان العـربـيـه §)§®¤*~ˆ° (http://www.weelan.com/vb/index.php)
-   منتدي الشعراء (http://www.weelan.com/vb/forumdisplay.php?f=8)
-   -   ليش أضّيقها وهي أصلا ضياق (http://www.weelan.com/vb/showthread.php?t=17461)

أبو غرام 29/09/09 (10:07 AM)

ليش أضّيقها وهي أصلا ضياق
 
بسم الله الرحمن الرحيم

واسعد الله اوقاتكم احبتي بالخير والسلامه دوما

اما بعد
فاليكم هذه القصه قبل طرح القصيد

وصدق من قال ... ان الشياطين تتطلق بعد رمضان .. وسبحان الله تصير نشيطه

اقرب دليل على هذا الحديث

ماحدث معي من الاخ خلف الغريب

فلقد كنت سلمكم الله ... في يوم الجمعة الماضي .. صاحي من النوم وش حليلي .. ذاكر الله ونفسي هاديه

واذا بشياطين خلف .. مرسلة لي رساله .. قصيده جميله نهار الجمعه .. اعجبتني ولامست من اوتار القلب الشيء الكثير

كنه قام يعزف على اوتار القلب ويخرش الاوتار بعد ^_^

المهم

شياطيني انا بعد ماهي قليلة شر .. ومثلها مثل شياطين ابو خالد .. توها طالعة من التصفيد وحشر رمضان

مار وهي تزخني اللهم ياكافي .. وتصير تشيلني الشياطين فوق وتضربي تحت حتى انصعت لها

والمصيبه مانصعت لها الا وانا بالمسجد ... واليكم هذه المعلومه يا اخوان

الشياطين تبقى معك لو تدخل المسجد .. سبحان الله ^_^ .. المهم .. مادريت الا وانا ارد على ابو خالد واجاريه
بهذه الدوشانية .. والامام يخطب .. ووالله اني مدري وش قال ووش يقول ... ماني معه
ههههههههه الله يغفر لنا بس

قلت عاد حسبي الله على ابو خالد .. مالقى يرسل الا بمثل هذا الوقت ؟
والحقيقه ماهي منه ... من شياطينه هههه
الوكاد يوم اقام المذن للصلاه الا وهي جاهزه وارسلتها بدون تعقيب ومراجعه ^_^

واليكم اياها ... يالله عسى تنول على رضاكم ... على الاقل نلقى خلف ماتصير صلاة الجمعه راحت كذا بلوشي
هههههههه

اخوكم
ابو غرام

الصوت من الشاعر الكبير ... ابو خالد :


ليش اضّيقها وهي اصلا ضيـاق
وليش اقصّرها وهي عدة سنيـن
.
.

العمـر لـو طــال يخـتـم بالـفـراق
وكلـنـا عــن هالحـيـاة مفارقـيـن
.
.
من قبـل تاكـل مـن الدنيـا طـراق
عيش عمرك منت عايش مرتين
.
.
لا تـحـسـب للسـمـيـن ولـلـدقـاق
الدقـاق يـزول ويــزول السمـيـن
.
.
وانظر بقلبك شف احوال العـراق
تقـتـنـع لاشـفــت دار الـرافـديــن
.
.
والهمـوم اللـي علـى قلبـك رواق
فلـهـا بالصـبـر والـذكـر المبـيـن
.
.
ماحدن مع هالزمن سـوى اتفـاق
يوم عسر ويوم يسر ويـوم بيـن
.
.
غامر بدنياك لـو فيهـا اصطفـاق
دلو ماء ودلـو نـص ودلـو طيـن
.
.
مايزيـد الــرزق كـثـر الاحـتـراق
ولاينـقـص فـيـه حـبـك للثـمـيـن
.
.
ولايـجـي بـالـهـم والا بالـطـقـاق
ولابحرقـة قلـب والا سهـر عيـن
.
.
القناعـه كنـز طـول الـدهـر بــاق
والطمـع ضيـع كنـوز الطامعـيـن
.
.
والـلـوازم ودهــا رجـــل حـقــاق
دون ستـر الوجـه لايمكـن يلـيـن
.
.
بـس حـاول مايجـي منـك نـفـاق
وش حلاة الادمي من دون دين ؟



فكان هذا الرد من الجاش :





في مسير العمر وقفـه وانسيـاق
ودرب مظلم آخره واضح مبيـن
.
.
ياعشيري لاتقول الوقـت ضـاق
الجمل كتفه علـى الدايـم متيـن
.
.
مايضيـق ولايعيـق ولا يعـاق
عارفن قدره مـع السـر الدفيـن
.
.
لا اكتسيت الدين وايقنت المـذاق
تكتشـف دنيـاك مافيهـا غبيـن
.
.
والبلـد لاشفتهـا تاكـل طـراق
اصح واعلم تالي الفسقـه انيـن
.
.
اسع واسبح والبحر وسطه عماق
وإنتشـل در الجواهـر والثميـن
.
.
واحذر الهفـوه سمينـه والدقـاق
لو يفوت الـدق مافـات السميـن
.
.
العمر شاشة بياضن فـي بـراق
والخطا نقطة سـوادن بالجبيـن
.
.
واللـوازم مابهـا ميـل وحقـاق
واجبن توفيـه مادامـك رزيـن
.
.
الفتى حرن يطيق اللـي يطـاق
وان تمادى الوضع عدل باليميـن
.
.
والحياة ابواب له فكـرن وسـاق
وجاشن اجسر بالمصاعب مايلين
.
.
ان زهى بك حظ فجيت الـزراق
وان تردى ماهو مقسومن يزيـن
.
.
الرضـا تفاحـة الصبـر ورواق
عن هبوب السخط يوم الوقت شين
.
.
والحظيظ اللي مسيـره بالفـواق
ولامشى ماهـو مـدان ولامديـن

وسلامتكم

حمد الخمعلي 29/09/09 (11:15 AM)

رد: ليش أضّيقها وهي أصلا ضياق
 
الاخ ابو غرام0

صح لسانك ولسان الشاعر الكبير خلف الغريب0

جميعكم شعراء متمكنين وقصايد تحمل اتجاه صادق0



هذي ماهي شياطين اعتقد انها ملوك الشياطين الي خلتكم تبرزون بها القصايد الجميله0

تقديري لك ولأبو خالد

أبو غرام 29/09/09 (11:31 AM)

رد: ليش أضّيقها وهي أصلا ضياق
 
هلا بك اخوي حمد
شرفتني وزدتني نورا بحضورك من هنا

اما من ناحية انها ماهي شياطين

لا والله شياطين وملائكة شياطين على ماتفضلت والا وش تبي نهار الجمعه قبل الصلاه تحضر ؟

^.*

لا خلا ولاعدم من تشريفك اخي

ودي وتقديري

مزيد المزيد 29/09/09 (12:19 PM)

رد: ليش أضّيقها وهي أصلا ضياق
 
صوت وصدى رائع ..

كلمات خلف الغريب تستفز اي شخص يتذوق الشعر ليكتب

فما بالك ان وصلت لشاعر متمرس وجميل

صح ابدانكم جميع ولاهنتوا

دمتم بخير

بنت الكحيلا 29/09/09 (12:35 PM)

رد: ليش أضّيقها وهي أصلا ضياق
 
صح لسانك اخوي ابو غرام ولسان الشاعر جعفر الغريب

والله يعطيكم العافية على هذا الإبداع الذي لا يستغرب من شعراء مثلكم

لكم تحياتي وتقديري

صالح السالم 29/09/09 (01:59 PM)

رد: ليش أضّيقها وهي أصلا ضياق
 
صحت القلوب والألسن

صوت وصدى يمتبان بماء الذهب ليس غريب عليكم ولكن الغرابه بأنكم لا تتحفوننا بالمزيد من ابداعكم

حقيقه كلما انتهيت من قرأت قصيده عدة مجددا ... لله دركم

تقبلو مروري

عوض بن خميس 29/09/09 (02:01 PM)

رد: ليش أضّيقها وهي أصلا ضياق
 
ابو غرام
ماهذا؟؟؟
ماهذا الابداع المتدفق
لاخفيك سرا لقد وقفت هنا طويلا
سلمت وسلم شاعرنا ابوخالد
فانتم نجوم تستطيوا نثرالابداع حيث ماكنتم
تحياتى واعجابى


الساعة الآن (07:59 PM)

Powered by vBulletin® Version 3.8.7
Copyright ©2000 - 2025, Jelsoft Enterprises Ltd
شركة استضافة: استضافة رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه