اللي حصلـي يـا محمـد كفانـي=بتوب عن ماضي غرامي وتاليـه
مليت من قولـة حبيبـي نسانـي=ومليت من طرد المقفـي وطاريـه
البارحه مدري وش اللـي بلانـي=راسي على كتفي من الهم حانيـه
قمت آتفكر وش حصل في زمانـي=وقلبي وش اللي في حياتي معنيـه
حسبي على اللي بالهوى كد رماني=اللي بدرب الحب مغـدي مباديـه
ما راف بي يومـن حبـه حدانـي=وما ذاق ما ذقنا عسى الله يشقيـه
ياما عطيته مـا بخلـت بحنانـي=وياما طلبني وأبسط القـول لبيـه
عطيت مافكرت لـو مـا عطانـي=الحب والتقدير مـع لمسـة ايديـه
حتى الشعر لو ما اكتبه به عصاني=ما عاد تشفي كيف راسي قوافيـه
ضعفي انا لا قال تكفـى عشانـي=أفز مثل اللي فزع مع بنـي اخيـه
مير الوكـاد الوقـت هـذا أنانـي=دخنا ولا ذقنا من الوقـت حاليـه
إن قلت أعاني صدق فعلا أعانـي=والحظ الأصقه ما سمع من يناديـه
يا الله تغفر ما بـدر مـن لسانـي=وتعفو عن اللي منهكاته معاصيـه
انت الذي غيـرك مولـي وفانـي=وانت الذي كل المخاليـق تدعيـه
لا صار حظي ما عرف عن مكاني=رحمتك با اللي كل هم رثـع فيـه

صالح الجطيلي

شاعر مميز ورائع دائما

ضعفي انا لا قال تكفـى عشانـي // أفز مثل اللي فزع مع بنـي اخيـه
مير الوكـاد الوقـت هـذا أنانـي // دخنا ولا ذقنا من الوقـت حاليـه
إن قلت أعاني صدق فعلا أعانـي // والحظ الأصقه ما سمع من يناديـه


صح لسااااااااانك مليووووووون ولايكفووووون

دمت بخير