الحر يوم الهد بيـّـن من الهدّ=والشعر عندي حر واليوم هده
حررته من البرقع و لدّ ثم لدّ=وكفخ ورا من شد فوق الاشده
مس ٍ لمس تفكيره و جاك مرتدّ=متحدر ٍ من فوق راس ٍ تعده
من عقب ماهو بالوفا دوم ينعدّ=اليوم غيـّـر بالوفا والموده
لياصار خلك ما يواسيك بالجدّ=وقت الرخا به ناسه اللي تسده
ليا جتك طعنات الاصاحيب باليدّ=طعنات عرق ٍ تكنزه ثم تشده
ياشينها وانا مشاويري عقدّ=ماهي مزوح ولا كلام ٍ ترده
يوم ان قلبي يفرش الورد والودّ=وانت الضغينه داخلك مستجده
حتى الجماله مالها فزوع تنعدّ=وماتت معاريف الزمن والمكده
ويبست غصون الصدق باليوم الاسودّ=والضيق معبر بين مده و مده
مخطي نعم مخطي ولاجيتك بصدّ= مسامحك لو سيفك ذبحني بحده
جزيتني نكران وشلون تجحدّ=شلتك وانا مالي على النفس شده
رفعتك بكتف ٍ به الحيل منهدّ=حتى عزومي من رفعتك مهده
علمتك اسلوب الرمايه مع الندّ=واليوم ترميني و حيلي تهده
( طعنة ظهر ) مابعد ترويضها ردّ=تجبر عزيز ٍ ضاق ثم باح سده
عواصف ..و ظلمه ..و سحب اتلبدّ=وانا التراب ازريت عني ارده
اوهمت نفسي بالنجاه و ترددّ=كلام ( ابوي ) وقمت غصب استرده
يقول : ( يا وليدي ) ترى الوضع مشتدّ=وما كل واحد ودك اشبه بوده
ويقول : بعض من العرب مالهم ودّ=لا ترخي بحبلك و حذرا تشده
نعم ( يبه ) فهمت قصدك وانا اشهدّ=ان الرفاقه ماهي بطول مده