الشمس غابت وهبن النسانيسي=والليل خيّم وزاد الجرح والكيه
وغديت مثل اللذي وسط المحابيسي=وباقي على قصّته شهرين وشويه
توجهو له رجالٍ تتعب العيسي=ولافاد بابو القتيل الجاه والديه
ومات الامل بعد ماعادو مفاليسي=ووصوه بانه يتوب ويصلح النيه
موته تحقق وثبّت بالقراطيسي=من قاضي المحكمه باحكام شرعيه
وزادت عليه المواجع والكوابيسي=البال مشغول وعيونه شقاويه
يدق قلبه مثل دق المراويسي=ويرقب لموعد قصاصه كل فجريه
هذاك حاله ترى بكل المقاييسي=لامن لفى الليل حالي زيّها زيه
همومي اللي وسط قلبي مراميسي=ليا اظلم الليل دايم نارها حيه
وليا اشرقت شمسنا بعد الغطاليسي=اودّع هموم وسط القلب مكميه
واسج رجلي بعيد عن البلاليسي=اهل الحسد والهروج الاصطناعيه
لاابعدت عن لمت وجيهٍ معابيسي=ارتاح لو كنت وسط ارضٍ خلاويه
لاصرت وحدي ولو كثرن هواجيسي=ابرك من مقابلة بعض الهلاميه
بسج رجلي وزيدن ياوساويسي=ولاني مقابل رجالٍ مالهم فيه
لاني من اللي يتعبون العراميسي=اهل الوفا والنقا ضدادت الهيه
عيال نومس محرّقت المحاميسي=جعافره من ضنا نسل العواجيه
ويلان حازو على كسب النواميسي=ماهي دعايه ترى علومٍ حقيقيه
والهرج ماينبني من غير تأسيسي=افعالنا من قبل حكم السعوديه
ماننحني رغم تأثير التضاريسي=الاّ لمن يحصي الحسنات والسيه
ونفرّق الطيبين من الهلابيسي=ودخيلنا مايجيه الضيم موليه
ونكرّم الضيف في زين المجاليسي=والجار حقّه ماينقص منّه شويه
ونعطي ولو مانبقّي شي بالكيسي=وندمح خطاياً تجينا لااراديه
وندوس رايٍ سديدٍ مابعد ديسي=ونفزع ليا استفزعونا قوم ماطيه
نركب على الضمّر وللخيل فريسي=ونرد حقٍ وخذ من غير احقيه
وكل القبايل لها بصمه وتدريسي=في منهج الطيب وصلو للنجوميه
افعالهم ماتجي خلف الكواليسي=حطت لهم في مجال العز ماريه
وارجع على اللي بدت منه هواجيسي=اللي ليا جا يجي همّي وطاريه
ليلن ليا حلّ زادن الوساويسي=يضهر همومن على الانذال مكميه
ياليل بعّد ترى كل الاحاسيسي=تكرهك لانك تجيب احزان مخفيه
وياشمس طلّي وهبي يانسانيسي=وياهم ودّع وانا بسج رجليه