ياما براسي من كثير الطواري=شي بسيط وشي ٍ يشيب العين
ماني من اللي لا طمح بالمحاري=انا طموحي مثل فكر السلاطين
ادري تعب واعرف واقدٌر واداري=وافهم اجي من وين او رايح لوين
لأن فكري فيه الارسال جاري=يهوا الصعيبة حيل وما يداني اللين
قلبي شجاع وبظلم الليل ساري=لو غيرو بعض البشر بالعناوين
اعرف حجرها والمحاديب كاري=وسهيل يعرفني وانا عارفه زين
يعني بداوه مع توجه حضاري=ماخذت وحده لكن اخذت ثنتين
وهل الحسد واللي يبون انتحاري=بعض الرفاقه واللي عنا بعيدين
ماهم ضلع طويق صفق الذواري=والسيل قلب تربة الارض للطين
وانا اطوف هالخطأ بختياري=وليا بغيت ازعل افر الموازين
عطيب مضرابي ومجنون زاري=مايعشق خبيتي يحب النياشين
وانتم مثل متقلدات الخزاري=يعني بنات ومترفات ومساكين
متقابلين لبعضكم يالكناري=يزها لكم صبغ الشعر والفساتين
وانا بمجلس به دلالي وناري=وش عاد لو صرتوا علي متحامين
انا قراري في يميني قراري=مبطي ما ارد الشور ماهو بهالحين
وانتم لكم باليوم عشرين طاري=في كل حلقة فيه رسمة وتلوين
ياهل الحسد واهل الخبث والمواري=بانت عليكم نية الحقد والشين
وانا سواد الليل كنه نهاري=الجو ما يظلم بعين المصلين
اكرم ظيوفي واحشم جدار جاري=واللي يجيني له يديه معاوين
احب راع الطيب وافخر واماري=واكره رجال ما يجونك على الدين
واللمبه الحمرا ما تبغى بواري=لاخضرت نمشي بسلم وقوانين
ويهل الغشامة جنبو عن مساري=مافيه داعي نكشف العلم ويبين
وترى تجمعكم دليل انتصاري=ياسربة عني تحالف شياطين