سر ياقلم واكتب على الطرس مكتوب = مكتوب ياصل صاحب(ن) حيل غالي
الصاحب اللي ماهقينا به عيوب = واستغفر الله لو غلطت بمقالي
ثم ياصل المكتوب ماهو بمكذوب = رجل(ن) ليا مني نصيته عنا لي
فواز بن فرحان ياخوك مطلوب = اقرا قصيدي ياعميد الرجالي
قلبي غدا ياخوك من شان رعبوب = غرو(ن) صغير فيه كل الجمالي
عيون نجل وحور والخد كالروب = والخشم مثل السيف وسط القتالي
وشعره كما ليل(ن) طويل(ن) ومصبوب = ومبسم جميل وعنق عنق الغزالي
ابيك تعذرني ترى بس يادوب = لمحت لك عن وصف زين الدلالي
ودي اوصف بس ماعندي اسلوب = عشان اجيب وصوفها بالكمالي
من يوم شفته قلت هالزول محبوب = هالزين كله ماوصله خيالي
قلبي تعلق واصبح اليوم مصيوب = من حبه اصبح عقلي اليوم خالي
من حر مابي عدي اقطع الثوب = وامشي مع الشارع تقل بي خبالي
ماهو جنون الا من العشق منكوب = وشلون ابى اوصف حالتي ياحلالي
الدمع من عيني على الخد مسكوب = ابكي على فرقاه والهم جالي
مالي جدا غير اكتم الهم مغصوب = يمكن اني اسلى عنه يابن الحلالي
باصبر على جرحي ويكفيني ذنوب = وارمي حمول(ن) فوق ظهري ثقالي
بامشي مع العالم ويسترني الثوب = واضبط الغترة واعدل عقالي
حق البنادم دايم الدوم مسلوب = عند البدو في الحب اول وتالي
هذي نهاية جملة هموم وكروب = جتني هدية من صروف الليالي