أحبتي أضع بين أيديكم هذه القصيده التي تشرفت بإلقائها
في الحفل الذي اقامه أبناء الشيخ / صالح بن الامعط العواجي
بمناسبة تعيين الشيخ/ فهد بن صالح العواجي نائبا ً لشيخ شمل قبيله ولد سليمان من عنزه
وتخرج الشيخ/ عبدالمجيد بن صالح العواجي برتبة ملازم

ياهاجس الاشعار شرّف بي على راس الجذيب=والنايفه خابرك تشمخ فوق وتعديبهـا
اما انت جيب النّدر الجزلات وإلاّ لاتجيب=خلك على خبري ترى الجزله مضرينيبهـــا
نبي البيوت اللي ليامـن سمعها الفطن اللبيب=أبدى رضاه وقال هالشاعر منين يجيبهـا
من فضل ربي لي مع الشعار مقسام ونصيب=وسلوم وعلوم الرجال آخذ بها و اعطيبهـا
ياهاجسي والحفل حفل شيوخ والموقف صعيب=ولا ينطح الصعبه سوى رجال ٍ هقـت وهقيبهــا
بالحفله اللي ماحضرهـا الوجه الاقشر والغضيب=وغير الكلام اللي يسر البال ماتوحيبها
حفل الشيوخ اللي يفكون الطليب من الطليب=أفعالهم مضرب مثل كل العرب تدريبهـا
اهل الوفاء واهل الكرم والشور والراي المُصيب=وأهل البيوت اللي تبدّد خوف من ياويبهـا
يستقبلون الضيف بالترحيب والصدر الرحيب=وجيه ٍ بشوشه والتواضع طبعها من طيبهـا
لاصحابهم مثل العسل وإلا مثل سمن وحليب=وإلا العدو نخواتهم من مرقده يصحيبهـــا
شيوخ ٍ ليامن الزمـن مال وعوى بالدرب ذيب=إزبن لهم تلقى الأمان وماتبي ترهيبها
يوم الجهل سايـد وذاك الوقت باحداثه رهيب=سيرة رجال أبطال لازال الزمـن يحكيبها
نطيحهم لوبه سطر حزة لقاهم يستصيب=لو حمّر عيونه ليامـن شـافهـم يغضيبهـــا
اللي يبون ألاّ يجي بالطيب وإلا بالغصيب=ضرباتهم لو جت على صم الصخور تذيبهــا
لاهل الزعامه ماغدى ثار ٍ ولاحق ٍ سليب=وقفاتهم عبر الزمن نِزعـِل بهـا نرضيبهــا
شاهدهم السيف الحدب والخيل عجلات الهذيب=وماسطّر التاريخ والديره وشمّخ نيبها
سلم وعوايد جدّ مايدخل بها الشك المُريب=واللي من العود إكتسبها للولد يوصيبهــا
بسم العواجي نفتخر عند الاجانب والقريب=شيوخ لـ فعايلها تشوش الروس ونماريبها
وحنا وراهم لا دعونا بالمواقـف نستجيب=قوم ٍ تزعمنا خلف سبع الرجال وذيبها
مقدم ضنا سليمان راع الجاه والساس العريب=بوجهه سمات الخير وأطْيَبْ طيّبَه يحريبها
خلف صحيب المرجله نعم المرافق والصحيب=تجري معه مجرى الدماء يصبح بها يمسيبهـــا
ويستاهل المنصب فهد لعل شمسه ماتغيب=لانه من شيوخ ٍ يفيد المجتمع تنصيبهـــا
الساعد الايمن لبو سلطان بغيابه ينيب=شيخ ٍ ليامن قام بمهمه يبي يكفيبها
ومن ضن به خير وصلاح اقول ضنه مايخيب=وجه السعد يمشي دروب الطيب ويناديبها
وعبدالمجيد بن الشيوخ منزهـن عن كل عيب=الطامنه عنها سما والساميـه يشفيبهـــا
نقول له مبروك وإستمرار لا رتبة نقيب=ومنها للاعلى يتجه وأعلى الرتب يمشيبهـــا
ماهوغريب الطيب من روس العرب ماهوغريب=أمجادهم ماتنحصي يصعب علي تحسيبهـــا
ولاقول بشيوخ القبايل نقص والله لي حسيب=كل ٍ له أمجاد ٍ بها يعتزّ ويباهيبها
واسم العواجيه فخر عند الاجانب والقريب=شيوخ لـ فعايلها تشوش الروس ونماريبها