نبتدي بسم الله اللي كل مخلوق ٍ يخافه=مالك الكون الفسيح وعالم ٍ سر الخوافي
دام جينا والشعر جاله مجال وزان قافه=وإجتمعنا والنوايا بيض والممشى كشافي
وحان تقديم القصيد وكل شاعر وإحترافه=من يجيب النادره تاكيد لحسابه تظافي
من هجوس ٍ يوم تملي كنها نقد الصرافه=عوّدني لابتكار النادرات من القوافي
حبكتي وإبداع فكري ماتعوّدت إستلافه=شاعر ٍ موهوب وأحسب للثقايل والخفافي
والسلام أقدمه لاهل الوفاء واهل الشرافه=مايخص أعممه شامل على الحضار ظافي
عد من زار المشاعر وإعتمر والبيت طافه=ومادخل مسجد وصلى للفرايض بإصتفافي
وعد مايكتب وينشر عبر طيّات الصحافه=ومايسوّى من تجارب وإختراع ٍ وإكتشافي
في محل ٍ به يطيب الكيف مع طيب الضيافه=ومجتمع ماكنه إلا ملتقى علمي ثقافي
عند قوم ٍ ماتحسّب للخساير والكلافه=كاسبين الطيب والنوماس بافعال ٍ تشافي
المطايب تدّرج بالعود الأزرق بإلتفافه=وصنعة الرسلان بالمجلس مقابيل ٍ مقافي
كرّموك وقدها ياعيد يارجل الثقافه=كان جت بالعلم عالم كان جت بافعال تافي
الف مبروك ٍ لفوزك زايد الف ٍ بالإضافه=وأنت والله تستحق لكل ذلك يالسنافي
شاهد أصحابك توافد زافة ٍ تقفى لزافه=وذا دليل ٍ قاطع إنك غضوري معدنك صافي
الوفاء ابوك أتصف به وأنت توصف بإتصافه=شبل من ذاك الاسد حلياه مافيه إختلافي
مكتسي بالطيب كله من فراشه لالحافه=ماطفاء له نور بيت ولا وجار النار طافي
يكْرُم ابراهيم لوّ الوقت مشتد بجفافه=وعن إكرام الضيف ماهي تمنعه كثر الحلافي
من كبار أعيان ربعه ماعلى هذا إختلافه=كافي إنه ينتسب لمعدلين الميل كافي
وله إخوان يشابهونه باللباقه واللطافه=كلهم نقوة نشامى مابهم رجّال هافي
ومرضي الشيخ المسمّى كلهم ساروا خلافه=أشهد إنه شيخ وافي من سلالة شيخ وافي
والسويلم مشيختهم بالتوارث والخِلافه=يحملون البيرق اللي من حوالي قرن طافي
واضح ٍ تاريخهم بكتاب يعرف من غلافه=مثل نور الشمس وقت شروقها ماهو بخافي
ومن يقاصر غضوري ماشاف هوْن ولا مخافه=ماعليه إخلاف بحماهم قرير العين غافي
يوم وقت العوز تلقى بيتهم يندى رفافه=للضيوف يقلطون الحيل وسمان الهرافي
ويوم دورات المعارك والمغازي والحيافه=والسلاح أم الفتيله والشباري والشلافي
لاتعلّوا مسرجات الخيل مافيهم مرافه=خوّفوا قلب الشجاع اللي من اول مايخافي
خصمهم يلقى المهونه والعقوبه والكسافه=ولاسمع نخوة عيال العوْد جاء فيه إرتجافي
وضيّع الهقوه وهوّد وإختلف من شي شافه=وغيّر النيه وعوّد دون كسب الفود حافي
يانقاذ اللي نخاهم ياخَلاصِه ياسعافه=يا إنتصار اللي قصدهم من قهر جافيه جافي
بالدلايل مثبته ماهي بتمثيل وخُرافه=وأتحدى من يجيب ثبات للي قلت نافي
والكلام المفترى والزور ياسرع إنكشافه=مايثبّت مع مرور الوقت تسفاه السوافي
وإسمحوا للجعفري لو كان يوجد شي طافه=وفيه بيت ٍ ودي أن أكمْله قبل إنصرافي
شاعر ٍ قدامكم يعلن قراره وإعترافه=ماحصرت أفعالكم هذا قراري وإعترافي
ومن سعى للإجتماع أقول له يارب عافه=عاش من رحّب وحيّا بكل من ياتيه لافي
والختام اقول نشكركم على حسن الضيافه=والله يديم الرخى والخير ويديم العوافي

.

مرحبا مرحبا بالمحيط الهادي
/////// حمدالضوي


مرحبا بالشاعر اللي ياقريت بياته=يرتوي راسي جزاله والسبب راعيها


ابدعت ياحمد ولا غريبه عليك عند حضورك يحضر الشعر الحقيقي
بيض الله وجهك
وصح الله السانك
ويستاهلون ربعنا ماقلت
سجل اعجابي

ابدعت ياحمد ولا غريبه عليك عند حضورك يحضر الشعر الحقيقي
بيض الله وجهك
وصح الله السانك
ويستاهلون ربعنا ماقلت
سجل اعجابي

البقاء ياشاعر ٍ راقي رفيع ٍ ذاته=البيوت لياحبكها ينسجم قاريها
من مروره نستفيد وناخذ إرشاداته=وساحة الشعار لامن دشها يثريها
طول عمره للمراجل رافع ٍ راياته=من رجال ٍ ماتبيع المرجله تشريها