في عامنا الماضي بداية محرمْ=أنا وبعض من زملاي إجتمعنا
وقمنا نتناقش في مواضيع الاسهمْ=والكل منا قال عنها سمعنا
قالوا بها مكسب ولافيه تحلمْ=وحكوا لنا بالمغريات وطمعنا
البعض منا قال ولشوركم تمْ=والبعض الآخر قال روّح ودعنا
وصرنا مع اللي خموا السالفه خمْ=نمشي بلاتفكير في ماصنعنا
يعني على ماقيل ناس ٍ غشمشمْ=وبكل قوّه للهلاك إندفعنا
ومن يوم بكره للبنوك نتقدّمْ=باوراقنا ومايطلب البنك معنا
كل ٍ معه تعريف جاهز مختمْ=ماندري إنا بالمحابل وقعنا
وعلى مدير الفرع قمنا نتزاحمْ=قال بطلبكم للإداره رفعنا
ومن بعدها كل ٍ لقرضه تسلّمْ=وبداء التداول وإشترينا وبعنا
نضرب بها مانعرف الكيف والكمْ=تهنا الطريق ولاعرفنا سنعنا
لو إنتظرنا شوي حتى نتعلّمْ=أفضل لنا لكن لها ماربعنا
قمنا نضارب والدراهم تليّمْ=ولياحصل مكسب بالأكثر طمعنا
إذا كسبنا ننبسط ونتبسّمْ=والعكس لامنا خسرنا جزعنا
نتعب ونجمع والهوامير تلهمْ=حسبي عليهم ضيعوا ماجمعنا
ليامن قلنا ننتعش ونتقدّمْ=طحنا بهامور ٍ كبيرٍ بلعنا
ولتوصياته نتبع ونتعالمْ=أثره يوصي والخبيث يخدعنا
وطاح المؤشر والخساير تفاقمْ=وبدري لصالات التداول فزعنا
قلنا علام السوق قالوا تضخمْ=بين المؤشر والهوامير ضعنا
واصبح علينا الوضع صعب وتأزمْ=والمشكله لحلولها ماستطعنا
أنصحك ياناوي على السوق تِقدِمْ=طعنا إبتعد عن دوخة السوق طعنا
خذ الخبر مني وغيرك معلّمْ=قبلك ترانا من غثاها شبعنا
الكل منا صار للبنك ملزمْ=ياما دفعنا أقصاد ياما دفعنا
وصل التقاعد والمعاشات تحسمْ=والبنك عشر سنين فيها لطعنا
وديوننا صارت تزيد وتراكمْ=وبالمختصر خالين الايدي طلعنا

المشاركة الأصلية كتبت بواسطة بنت الكحيلا (المشاركة 337724) صح لسانك اخوي حمد الضوي والله يعطيك العافية على القصيدة الرائعه ابدعت بما كتبت بارك الله فيك لك شكري وتقديري

المشاركة الأصلية كتبت بواسطة سليمان مفضي العنزي (المشاركة 337734) صح لسانك كلام في الصميم وشعر جزل تقبل اعجابي

المشاركة الأصلية كتبت بواسطة محمد بن موسى (المشاركة 337739) درع عنزة / حمد الضوّي لا فظ فوك لافظ فوك لافظ فوك صح السانك واعتلا شانك على هذا النص الرائع والذي يعبر عن ماعاناة الشعب السعودي من مآسي الاسهم ونكباتها لله درك اخي على هذة الجزاله وتذليل القوافي ونص ياحمد يشفع لك غيابك الفترة الماضيه فشاعر بقامة حمد الضوّي نتلهف لكل مايقدمه من نصوص فلا تحرمنا جديدك تقبل فائق الود والاعجاب

المشاركة الأصلية كتبت بواسطة مشهور الرشدان (المشاركة 337746) ((درع عنزه )) صح لسانك وعتلا شانك قصيده جزله ولا نستغرب الجزاله من شاعر بحجم حمد الضوي لله درك ولاتحرمنا جديدك محبك ابو حفص

درع عنزه
والشاعر الكبير حمد الضوي
قصيده جزله لايسطيع كتابتها الا حمد الضوي
تحكي واقع حقيقي كثير من الشعب السعودي ذاق مرارته
صح الله لسانك والله يعطيك العافيه

المشاركة الأصلية كتبت بواسطة حمد الخمعلي (المشاركة 337798) اخي حمد الضوي صح لساانك وكل ماذكرته حصل يالله المستعاان0 الله يعوض المسلمين بخير0 كُن بخير

المشاركة الأصلية كتبت بواسطة احمد الضوي (المشاركة 337810) درع عنزه والشاعر الكبير حمد الضوي قصيده جزله لايسطيع كتابتها الا حمد الضوي تحكي واقع حقيقي كثير من الشعب السعودي ذاق مرارته صح الله لسانك والله يعطيك العافيه

المشاركة الأصلية كتبت بواسطة جائز المليحان (المشاركة 337853) يالله عليك يالضوي حمد اشهد انك جبتها بالصميم ويمكن الكثير هنا مارد .. لأنك اوجعت القلب وذكّرته بشي وده ينساه قبل اسبوعين .. قبل نهاية الفصل الدراسي الاول تحادثنا بالاسهم وذكرياتها وكان احد الزملاء شوي والا يذرف الدمعه .. ولكنه اردف يقول انا ارحم من ابو فلان .. وهو زميل لنا ..مع إن قصته .. مو حزينه بقدر ماهي سوء تدبير للمعلوميه .. انا جديد لديهم ولم اتجاوز السنه الان فلما سألناه .. وإذا به .. استنفذ 59 مليون ريال .. طبعاً مع التسهيلات وبسبب التسهيلات .. رااااحت وبقى متعلق الان وعلى قولتك .. للعشر سنين يمكن المشكله .. هو موظف وزوجته موظفه وعنده محلات مايستفيد منهم إلا الكفاف .. ومع هذا يحمد الله ويشكره إنه ما قدّم فصل .. بمعنى نصك مؤلم فوق ما تتصور اخي حمد .. وبالصميم وقد يكون هنالك من لا يود أن يتذكر ما مضى ممن سلم من الموت والمرض بسبب تلك الازمه فلله درّك وصح بوحك وحفظك الباري أخوك أبو أحمد

المشاركة الأصلية كتبت بواسطة بدرفهد الجعفري (المشاركة 338041) الله يكون بالعون حمد الضوي تكلمت عن معاناة الكثير بشاعريه مميزه صح لسانك

المشاركة الأصلية كتبت بواسطة خلف الغريب (المشاركة 338074) كلام واقعي وفي الصميم والله يا حمد .. نكبة الاسهم هي نكبة الشعب السعودي كافة وحسبنا الله ونعم الوكيل على المتسبب أيا كان .. انا الله يخلف علي سيارتي ههههه تذكرت ابيات لي قلتها بعد النكسة ومن ضمنها اقول : اول نشيل من النسب شيل بالكوم ..الله رزق منه القوي والضعافي واليوم ما ودك بحالاتنا اليوم.. كم واحد يمشي على الرجل حافي عقب الغناوة صار فقري ومحروم .. تسفي على حسابه هبوب السوافي اللون الاحمر جاب له شر وهموم .. وخلاه حتى من الطماطم يخافي المعذرة على تطفلي بهذه الابيات لكن الحال وحدة يا حمد .. صح لسانك والله يعين المسلمين

المشاركة الأصلية كتبت بواسطة سالم صالح (المشاركة 338167) حمد الضوي صح السانك استمتعنا بجمال النص وحضوره رغم انك فتحت جروحنا وذكرتنا بالماضي التعيس لله درك ودايم وانت مميز ياحمد وجزل

المشاركة الأصلية كتبت بواسطة تركي علي الخالدي (المشاركة 338220) الشاعر القدير : حمد الضوي ابدعت في هذه القصيده ايما ابداع وامتعت ايما امتاع واننا لفخورون بأنك تشاركنا هذا الابداع عبر ملتقى النخبه صح لسانك وتقبل مني تسجيل هذا الاعجاب بردي المتواضع

المشاركة الأصلية كتبت بواسطة سالم العنزي (المشاركة 339024) الشاعر : حمد الضوي ما اجمل الشعر حينما ياتي قريبا من النفس صادقا في كلماته جزلا في معانيه .. لن تفي الكلمات هذه القصيده حقها .. صح لسانك الي ان ترضى وسجلني من المعجبين بما تكتب