عين الشفق توشك على لحظة غياب=تعلن مواريها نهاية بقاها
أرخت على حد النظر ستر وحجاب=ردة مسافات النظر عن مداها
قامت تلم أطرافها والشفق شاب=أقفت تودع نصف يوم بداها
أقفت ثقيله بين وديان وهضاب=تاخذ عطاها لجل تبدي عطاها
موعد رحيل بوقت وحدود وحساب=رحله عظيمه قدرة الله وراها
أقفت حقيقة علم يصعب وينهاب=مهما بلغ وعي البشر ماحواها
لحظة رحيل بشكل يدعو للاعجاب=تقرا مواجعنا ولا احدٍ قراها
ترسم بريشة نورها لوحة عتاب=بالوان بانت في رحابة سماها
لوحة تظم الوانها نزف منصاب=لا حت على وجه السحاب وبكاها
اللون الاصفر بأحمر اللون ينساب=مزيج من لونين لوحة ضياها
لوحه تشد المهتوي صوب مرقاب=تحيي الجروح الكامنه في خفاها
رحلة غياب وخاطرٍ عاف ماطاب=وقلبٍ مع الذكرى يحن للقاها
صوتٍ ينادي داخلي طيف غيّاب=صوتٍ يرجعني على اول هواها
لوحة غروب تذكر احباب باحباب=لحظة غروب وسافرت بي معاها
ريح السما حاني وصدر السما باب=والشوق مركب والخفوق برجاها
لحظة غروب وقلب يشكي ولا تاب=من حب منهي وقتها ماعطاها