انتي رومانسيه وانا شخص عادي = عن عالم التقليد واهل الدعايه
العولمه تأثيرها له مبادي = درب المعاصي غير درب الهدايه
انتي بوادي والتطور بوادي = و انتي هو انتي لو سكنتي ولايه
يامثقفه ما هنا جديداً يعادي = ردي معي ردي قديم الحكايه
صولي وجولي في ربوع البلادي = ثم عيدي التفكير بعد النهايه
اول سبب جيتي معي بالعنادي = حتى احترقتي في لهايب لضايه
هبيلة تركض وراك السرادي = قلة حيا ومعها جمعتي اعصايه
نحط لك في كل صفحه سوادي = وقضية الجاني بحكم الجنايه
زيف المشاعر ماعليه اعتمادي = وقال المثل قبل العلاج الوقايه
وحبل الثقه ياصار فيه انعقادي = راعيه ما يصدق صحيح الروايه
اعطيك علم وما عليه انتقادي = وانتي هدف جيتي بوجه الرمايه
تلعب بك الاوهام وانا اعتقادي = انك وقعتي بالشبك بالبدايه
صرتي مثل سلعه بسوق المزادي = وانا الحقيقه فيك مالي هوايه
عشتي على امالً وراها نكادي = وبعض الوسايل ما توصلك غايه
ياطايشه خوذي كلاماً وكادي = ما ارضيت حياً ما يدور رضايه
واللي يقابلني بلطف ودادي = اقدره يا شاف قيمة غلايه
في حال و الا حال شاني حيادي = وكثر المأسي ماتبيح خفايه
وانا يكفيني بياض الفؤادي = واللي مضالي بالتجارب اكفايه
ولاني مجيب لكل صوتاً ينادي = وباتجاهل من تجاهل ندايه
ومن لا يقدر وقفتي واجتهادي = ماقف معه لو هو من اغلا اصدقايه
وان ما حصل تحقيق غية مرادي = بعض الموارد ما تكفي ضمايه
زال الكدر والجو يا بنت هادي = وانتي ومثلك صعب يلحق مدايه
والذوق ذوقي والاصايل ومادي = والبدع بدعي واعتني به اعنايه
وانا بدوي مابين تل وحمادي = مستانس والغيم غطاء سمايه
ريح الخزامي مع نسيم البرادي = هو مطلبي والناس كلاً ورايه