وش نبي بالسيف صار السيف عالة=دام ما للسيف في هالوقت قيمة
اكبر اهانة لبوش ولاحتفاله=يدخل التاريخ في جزمة قديمة
لو ما صابت راس بوش ولا عياله=اعتبرها لانتصار اكبر هزيمة
لأرعن امريكا ومن وقف بجاله=ما بقا عزة ولا قدر وحشيمة
دخنت كتف العروبة بالرجالة=ودفعت فاتورة حساب الظليمة
من يدور من غزاة ارضه عدالة =لا يحسب ما بقى له من حطيمة

صرنا دعاية حرب في تال الازمان=هذي نهاية عصرنا بالعروبة
وين العرب يوم العرب شانهم شان=من يوم ما خلوا طريق مشوا به
عبادة الخنزير جتنا والاوثان=وشارون قال لبوش هذي حروبه
حطوا لنا صدام حجة وبرهان=وسووا لابن لادن اسطورة كذوبة
وبيعوا شباب الدين في وسط دكان=واستبدلوا باجر الجهاد العقوبة
لعبوا بني صهيون بقلوب عميان=ومن العمى حتى الوطن فجروا به
وصار الاسلام ارهاب في كل عنوان=الله اكبر ديننا شككوا به
كنا عرب .. بس قسمونا لعربان=وكلن يجي له يوم يمشون صوبه
بارض العراق الشعب يذبح وينهان=سلبٍ ونهب وكل بيت عثوا به
واطفال تذبح وانهتك عرض الانسان=وحتى السجين بسجنهم عذبوا به
خطة بلير وبوش بحضور عنان=تقاسموا نفط العراق وغدوا به
والقدس يذبح شعبها دون عدوان=وكم واحد بسجونهم غيبوا به
وتهديدهم يرسل على الشام وايران=وباكبر دمار سلاحهم هددوا به
هجمة على اصول العقيدة والاركان=فتنة ولا هي بالحساب محسوبة
طبخة ومطبوخة على بلاد الافغان=واظنهم قدر اليهود طبخوا به
واظنهم ناس للاوطان خوان=تكسب جوايز مسلم غرروا به
واظنها واظنها كان من كان=يا الله دخيلك عن كباير ذنوبه
فرعون بوش وصار شارون هامان=والله يمهل للعباد العقوبة
غنوا لنا باكبر مزامير شيطان=حتى رغبنا للطرب واللعوبة
ورحنا نشجع سوبر ستار لبنان=وكثير من شعب العرب شاركوا به
شعب يموت وشعب يرقص لقنان=والجرح ينزف كنهم ما دروا به
وانا اطلب من الله يثبت هل الشان=وادعي لهم باليوم مليون نوبة
حكام نجد اللي يردون الاوطان=اللي حكموها من الشمال لجنوبه
على الشريعة حكمهم عدل واحسان=ما همهم ريح الشمال وهبوبه
متمسكين بديننا دون الاديان=نمشي على هدي الرسوب ودروبه
هدي الرسول اللي دعى الانس والجان= وما خابوا اللي ربهم وحدوا به