جملينا يالقوافي واستري وجه القصيد=حملك اثقل من هضاب المملكة وجبالها
هاتي البيت السمين وهاتي المعنى الفريد=شاعرك ما كل كلمة تعترض له قالها
الشعر به نستفيد وفيه شي ٍ ما يفيد=وكم صبي ٍ لاعقد يبلش بحل حبالها
من تصيد كلمته واحكم نظرها من بعيد=صادها واليا ارتكى لحمول متنه شالها
ومن تأنى بالمعاني واتبع راي ٍ سديد=ما جهل واليا جهل يلقى بها جهالها
الحروف اخطر من سيوف المعاني لو تحيد=عن دروب الحق والعقبى مهي عقبالها
وكل بيت ٍ ما غدى للبيت الآخر كالعضيد=فالسكوت عن الحروف من القصيد اشوالها
استفيضي يا مشاعر وانشدي بأحلى النشيد=وابدعي بالابة اللي تفتخر برجالها
لابتي هم عزوتي هم محزمي واغلا رصيد=لابة ٍ بين القبايل عالي ٍ منزالها
من نصاها في ذراها عاش بالعيش الرغيد=لا نشدته قال (وايل طيب الله فالها)
انتخو له واكرمو له والكرم له في مزيد=جلسوه وحسسوه بقدرها وجلالها
لابة ٍ يفخر بها التاريخ والعالم يشيد=والسوالف ما نخوض بقصرها وطوالها
وكل يوم ٍ تجتمع به لابتي هو يوم عيد=والتكاتف من قديم الوقت هذا حالها
يا سلام الله عليكم عد ما طاف العبيد=بالحرم واعداد ما ينشي صدوق خيالها
وعد ما طاح المطر والعشب ينبت من جديد=وعد ما غير شعيب ٍ سال لون رمالها
يا الرجال اللي لها عز ٍ ومجد ٍ ما يبيد=وارثين العز حتى سلموه عيالها
كل ما يولد وليد وقيل بأنه جا وليد=الوليد اليا انولد جا يتصف بخصالها
وايلي ٍ وارث ٍ من لابته عزم ٍ شديد=يتبع اقوال الرجال وفعلها وامثالها
ما تسيده الظروف القاسية ويعيش سيد=شامخ ٍ راسي ولو تصعب عليه احوالها
كن في رجله عن دروب الخزى والعيب قيد=ما مشى للناقصة ولا دخل دخالها
عفة النفس . الكرامة .وقفت الرجل العنيد=قوم .تملي قولها بالحق ما يملا لها
لابتي هم عزوتي هم محزمي واغلى رصيد=لابة ٍ بين القبايل عالي ٍ منزالها

المشاركة الأصلية كتبت بواسطة سعود العواجي (المشاركة 195607) الاخ الشاعر / عيد العنزي قصيده رائعه وابداع غير مسبوق بعد اذن الجميع تثبت لتميزها ..