يا بندر الفرحان هذا العشم فيك=يجيك رقمي ما ترد اتصالي
مفككه ما هي بحاجه لتفكيك=وانا الذي بالعلم فهمه خيالي
راسك يبي تفرمت ورقعه وتشييك=ومن بعدها يمكن تجاوب سؤالي
قلي علامك ما تبيني احاكيك=وانت الذي لا من تضايق شكالي
اعلن عليك الحرب خطه وتكتيك=اعلنت لك حربي بجيش انفصالي
الجيش للتأكيد ما فيه تشكيك=والا انا لا جيت جبتك لحالي
لا صار ينفخ فوك توكي له يديك=ما تسلم القربه برخو الحبالي
الوقت لو تذكر جمعنا صعاليك=ارفا خمالك وانت ترفا خمالي
يومنها بالضيق سودا لياليك=ما قلت لي يا عيد حالك وحالي
تعطيني الجزله وانا ارد واعطيك=مابيننا حتى قسمنا الريالي
لكن خساره خنت ابدا مباديك=مبدا الاخوه خنتها يا حلالي
الوادي اللي فيه ماهو بواديك=تمشي جنوب ووجهتك للشمالي
لا صارت الدنيا عن آخوك تلهيك=دنيا العنا يا جعلها للزوالي
حبك يـ مروح ساطي بقلب مغليك=والا انت مثل خليف حسبة عيالي
والله ما اظن الذي جاك يكفيك=ولاهو بعد يشفي غليل بـ بالي
تقطع يدي ما اتشوف رقمي ولاا يجيك=وان جاك رقمي لا ترد اتصالي