بيـن وقتـي والغيـاب وطـول دربـي=نبض روح.. وصوت حزن.. وترجمانـه
يوم جيـت وهاجـس الذكـرى عبربـي=سور صدراً ..ضم جرح ..وعـز شانـه
اختصرني ..واختصرته .. واختصربـي=الطريـق .. وسـادن البعـد.. وزمانـه
ضمني ( بردون ) غيمـه وانكسـر بـي=الخيـال اللـي رقـى بــي عنفـوانـه
مد كفـه.. تـل قلبـي .. وانحـدر بـي=بين صوت .. وسر مجهـول .. وميانـه
قال : زادي ؟ قلت:زادي ؟ قال : شربي ؟=قلت: شربي ؟ قال : زادي ؟ قلت: امانه ؟
قال: وان قالوا : خطأ..؟ قلت: أعتذربـي=قال : كيـف ؟ وقلـت : للعقـل أتزانـه
قال: تكفى ابيك..! تكفى ابيـك قربـي=قلت : هـذا القلـب شـرع لـك كيانـه
قال: حرفـي ليـه صوتـه يحتضربـي؟=قلت : مدري ؟ .. يمكـن التعبيـر خانـه
قال :ليتـك يـا بعدهـم تفتكـر بـي=لـو يدينـا فــي خطايـانـا مـدانـه
قلت : شد الـراس عالـي و افتخـر بـي=قال : امانه ؟ قلت : خـذ علمـن تكانـه
قال : اجل دربـك مدامـي حـي دربـي=قلت : اكيد ؟ وقال : خذ قلبـي ضمانـه