مدري علامي حزينه ضايقٍ صدري=لي مدةٍ ماعرفت الضحك وافراحه
يارب ياللي بغيب قلوبنا تدري=يارب عقب العنا تكتب لي الراحه

ضيقوا صدري وهو ضايق بليا=من كثر ترديد انتي وش بلاك؟
قصدهم بالمسأله فيني حميا=كلن يدق الصدر جعله فداك
مادروا ان الألم كله هنيا!=في صميم القلب عامل اشتراك
المرض بالقلب ماسوا كذيا؟؟=ارفق من اللي احسه في جفاك

ياوجد حالي وجد طفلٍ على ابوه=خلاه من بعد الدلع والدلالي
من مات ابوه الزوج للام زفوه=والزوج ظالم مايريد العيالي
عند العمام لجاير الظلم خلوه=والخال قاسي مادرى عنه سالي
يهل دمعه كل ماجف بكوه=ضاقت عليه الارض والحظ مالي
باب الامل في و جهه مسكين صكوه=قام يتذكر حلو ذيك الليالي
على حبيبٍ قلبه اليوم قسوه=وابعد وفي قلبي من البعد صالي
ماهو رخيصٍ لو جفاني ونسوه=اللي عطيناهم علينا المجالي
يسيل دمعي كل ماعندي اطروه=ياوجد روحي له وياشيب حالي
باب الرجا في وجه مغليه صكوه=يبقى ولو مات الامل دوم غالي

يانوف مليت الشعر والكتابه=ومليت من كثر التصاوير مليت
ودي اهاجر واعتزل هالرتابه=واعيش عمري دون هم وتناهيت

ماودي حتى النوم ياخذك مني..
..........................اغار لاداعب عيونك والاجفان

حتى الشتا مابيه والسبه اني..
........................اشوف حولك من يضمك ودفيان

واغار من طفلك اذا له تحني..
.......................مكانته لاجيت في وسط الاحضان

وابوك وامك اغتبطهم واهني..
.......................(؟؟؟؟؟) رضيت او كنت زعلان

واحسد جماعتكم اليا غبت عني..
......................كل يوم معهم تقضي الوقت طربان

وانا عليه كل يوم التمني..!!
.........................متى تجيني وانت لشوف شفقان

ولا انتظر منك الرساله كأني..
........................من ينتظر مبروك من بعد حرمان

يعني ليا من غبت عنك استجني..
..........................لا تلومني وانا غريقٍ وهيمااان

الله يسامح خطاك..ويشفي مصابي=ويجف دمعٍ ..من اسبابك ملا عيني
قتلت فرحة وصالك..وانته ادرابي=ماغيرك اللي ..هموم الوقت ينسيني
تدري وجودك يعزيني..عن اقرابي=وغلاك يسري ..بدمي مع شراييني
مشاعرك بارده..ماتحسب احسابي=قسيت قلبي عليك..وجيت تنهيني
سامحك ربي ..كثر ماغبت وغيابي=لين الزمن..علمك وشلون تجفيني

يالله عسى هالعام خير بقدومه=ونودع ايام الحزن والتعاسه
والماضي اللي فات نطوي همومه=ونمحي من الذكرى غرابيل كاسه
ونخيل براقه ونرجي وسومه=يغسل بخيره جوٍ العج حاسه
وتصفي لنا الدنيا وخيرك تدومه=وتزهر ورود العمروتروي يباسه

وشبقى لي منك ياسود الليالي
...................وش بقى يخفيه شين الحظ ليه!
حتى نوم العين ماعمره هنالي
....................لـــوعطى حظي بخلتي بالعطيه
بين حزن وياس حطيت الرحالي
...................والجفـــــا ومعافــــر الدنيا مطيه
ولابقى لي غير ذكرى انسان غالي
...................طالبك خلي لي الذكرى هـــديه؟

ضفيت في قلبي جروحي والاحزان
...................في معزلٍ بالقلب محدن يشوفه



والدمـــع لوانه على الخـــد هتان
...................مــــاخلي العـــدوان دمــعي تحوفه



والحـــظ ودعني وكشر بنيبان..!
...................معه الرجـــــا مقفي ولاقى حتوفه



عمري غـــدى للهم مرتع ونيشان
................شمس الامــــــل غطى علـــــيها كسوفه



سود الليالي مابها طيب واحسان
...................ولاحـــدن بها لدنيا تخــير ظـــروفه



الامر لله والصبر طب الانسان
....................لاقـــامت همــوم الليـــالي تلــوفه



يالله كان الموت راحه للابــدان
.................تنهي حياتي قبــل زود الكســـــوفه



وان كان لي حــظٍ تخفيه الازمان
...............عجــــل عليـــه بالفـــرج.. والمـــــروفه

مخرج..


لو نامت الناس مانامت عيون الشقي
...............يسامر هموم قلبه ويتجرع بلاه
ضاقت بعينه فجوج الكون لوهو فضي
...........الحزن جرعات من سم الليالي سقاه
لويخفي الدمع مجرى الدمه ماهو خفي
............شح الزمان وخذا منه الفرح واقتفاه
ماغير همه وضيق الصدر به يحتفي
.............متعاهدينٍ على الخوه بداخل حشاه

مبروك ياغلى قلب طاهر بهالكون=اقولها من قلب من فرحته طار
ليت المشاعر والاحاسيس يحكون=وتدرين عن صدري وش بداخله صار
عم الفرح في داخله وباح مكنون=وده يعبرلك ويشرح بالاشعار
عسى السعاده فالك اليوم وتكون=طول العمر رفيقتك دون الاكدار
من فرحتي بخلي الخلق يدرون=واشهر زواجك عبر ركني للانظار

يارب غفرانك ورحمتك يارب=هون على خلقك مصاب الجهيره
من هول ماشفته حشى الجوف مشتب=والدمع عيى لايوقف هميره
اطفال يتمزق حشاهم من الرعب=واشلاء تترامى بخوفن كسيره
اللي خذاها الموت في موقفٍ صعب=واللي تعاني من جروحٍ خطيره
ريم وغدير كانوا على موعد النحب=اروع مثل للمسلمات بمسيره
يارب نقيهم من الاثم والذنب=وفي جنة الفردوس روح الأثيره
هذا القدر لاجا ماعنه مهرب=يالله عسى حسن الخواتم اخيره

مابالحكاوي وترديدالسواليف..خير=مادام قفيت..وش لك في تواليها
خلك مثل ماانت..في قلبي وقدرك كبير=ونفوسنا الله اعلم وش خوافيها؟؟

ياقلب صبرك..وانا بكون في عونك=مصير الايام..والدنيا تنسينا
ماهو باول فقيدٍ..شح به كونك=قبله خذا الوقت..منا اغلى امانينا
قبل امس عايدك صبح..العيد بطعونك=واليوم من علقمه..ذابت اثامينا
حبل الوصل..لوتمده يقطعه دونك=عنا تكبر.. ولا هو يم اسامينا
من عاف حنيتك..غلاك..وجنونك=خله يدور على..غيرك ويعفينا
انسى ..وانا انسى مثل مالناس ينسونك=نعمه من الله..ترى النسيان معطينا

اضحك مع الناس .. وانكت .. واستهبل=وامثل .. اني سعيده .. لايلوموني
واليا اختليت .. بهمومي .. دمعتي تهمل=الله يحر .. دمعن .. حار بعيوني
متى على الله .. اعيش .. وفرحتي تكمل=مضت حياتي.. رهينة هم .. وغبوني

ترى المرض ماهوبعيب ومذله=ياللي تعايرني بالامراض وتهين
الحمد لله مؤمنه وارجي الله=ان المرض لذنوب الانسان تهوين
ومالي عن المقسوم دقه وجله=وارزاقنا بيدين خلاق الانسين
ان قدر الله بالشفاء حمد لله=وان ماقسم الحمد الله ملايين

عسى العوض في مقبلات الليالي=انسى بها مع ماضي الوقت مافات
وتفرج واعيش وخاطري دوم سالي=وابدل اوقات الشقاء باجمل اوقات

محشوم ياعمري وياروح روحي=انا الكسير اللي جبر كسره رضاك
جبرت خاطر من فقدك وينوحي=يجرع مرار الفقد ميتن ويرجاك
واليوم جيت بطيب قلبٍ سموحي=واستقبلك خفاق ماطاع ينساك
لانك هنااا الدنيا وبلسم جروحي=وحالي بدونك حال ماهي بتخفاك
مالي بهالدنيا ياغيرك طموحي=ولاحدن يساوي يالغلا تراب ماطاك
آمر تدلل (خل هالناس توحي=لو تطلبه عمري عسى العمر يفداك
كل المشاعر جتك جمله نزوحي=تبي تبل الريق من عقب جفواك
امطر عليها واغتبقني صبوحي=وانا اتصبح بك ولاقول يكفاك
امسك يديني لمني رد روحي=باشمه انفاسك وانا اقول لباك
وداعب خصل شعري وانا لك ابوحي=عيني بعينك وراحتي وسط يمناك

صاحبي لاترتكب فيني خطيه =وانت تدري قدرك بقلبي كبير
ماخبرت اني لحوح ولاشفيه=لكن الواقع غدى دونك مرير
لاتفارقني ولاتقسى عليه=راضيه لوكنت بالدور الاخير
دامني وياك وبنفسٍ رضيه=ماتدخل بالقياده يالامير
اعتبرني فرد من عرض الرعيه=مخلصٍ وياك جاهز للمسير
المهم ابقى انا وانته سويه=وهني من كنت لحواله تدير
المحبه يالغلا ماهي خفيه=وانت ياروحي بها اكبر خبير
شاعرٍ مرهف واحاسيسك نديه=ومن حروفك كل خلق الله تغير
ملهمي بالشعر ماخليت فيه=غير عقلٍ خايفه بعدك يطير
روحي ونبضات قلبي لك هديه=امتلك روحٍ بها مالك خشير
وحطني من ضمن ملكك بالهويه=واكتب اسمي عاشقٍ وضعه خطير

اسعد ايام الحياه اللي تجيبك=ياغلايه راضيٍ قلبك علي
شفت قلبي كيف طاير محتفيبك=لاتلومه وانت صاير له ولي

اجيك كلي مخلصه بالغلا لك=واشيل روحٍ ماتحمل غيابك
وابيع كل الخلق واشري تواصلك=واسلمك قلبٍ وفي ماصخابك
وتردني كلي كسور بفعايلك=اقسى وجع بالكون لحظة جوابك؟

(يالله عسى ماتكره النفس خيره=ياوالي الدنيا عليك التدابير)
بيتٍ عشقته له معانن كبيره=اردده قبل افهم الشعر واسير
علمني حب الشعر وانا صغيره=والنفس لاعافت اقول العوض خير
وان الحياه وان طال امدها قصيره=ماتستوي نعيشها هم ونحير
والصبر مفتاح الفرج والبصيره=والكسر ياتي له مع الوقت تجبير
وان الامل وكتاب ربي ذخيره=دوا القلوب ايات ربي وتكبير

ماهمني من يقول اني مزاجيه=ابيات شعري على كيفي اطوعها
هالناس مدري وش اللي خصها فيه=رغباتهم والمشاعر غصب اتابعها
الشعر يوم اكتبه مرات حريه=ومرات من ضيقةٍ عجز اطابعها
ومرات اجيبه خيال ودون ماريه=وساعات تجبرني الاشواق واشبعها
من فضل ربي ماهو بيدين وحشيه=ناسٍ عجزت اتأقلم مع طبايعها
تضحك معي والقلوب السود مخفيه=تفرح بزلات نفسي مع مواجعها
والخلق لو طعتها ماهي بمرضيه=لاقفيت كنك على لحمك مجوعها
ودك مثل هالبشر بالهم مبليه=وافواههم ربي الخلاق يردعها

يحز في خاطري ذكراه مع جملتين!=ليت الليالي خذته ولا بحثت خافيه
على الاقل لو رحل يبقى بجوفي دفين=اعيش ذكراه عن غيره لنا كافيه
بس القدر حالف المستور لازم يبين=وجو الليالي يعكر عجها صافيه

كثر السهر لوطول الليل عاده=النوم بدري للقلوب الخليه
الهم مايغديه ضم الوساده=لو فوقها للراس ضمة يديه
يارب ترزقني قوي الاراده=واهزم بها همن تجمع عليه

ياكثر من يفرح عليه ليا طحت=ناسٍ خلقها الله لالناس اذيه
لكن وراس اللي رحل ماتسامحت=تبقى القلوب السود ماهي خفيه

مات الكلام بداخلي مانطقته=غصيت بحروفه وحار بشفاتي

حسيبي الله عليكم ناس=هرج القفا ماتخلونه
هرج القفا عندكم نوماس =لوهو شويه تزيدونه

يانوف بي ضاقت الانفاس=والنفس بالغبن مشحونه
والهم بالصدر ماينقاس=وبعيوني الحزن يقرونه
ماعاد بالخلق طيب احساس=والطيب بالشين يجزونه
من هرجهم صابنا وسواس=لو يترك الخلق يبلونه
وين الوفا وين طيب الساس=ليه اكثر الناس يجفونه
صارت مصالح ودور افلاس=ومن نافق وحش يغلونه
الوضع في هالزمن منحاس=بدوا هل الطيب ينسونه
والله واللي خلق هالراس=طبعي فلا اعيش من دونه
اشيم الجار والجلاس=واجنب الهرج وطعونه
واعطي ولا ادور النوماس=طبعي لو اموت ماخونه

خلاص راح وانتهى من حياتي=ولاعاد ابي ذكراه والله يهنيه
خله مع اللي به مسوي سواتي=باشيل حملي عنه من شان يعطيه
اول مكانه وسط روحي وذاتي=محدن وصله داخل القلب مخفيه
واليوم ودعته ولا ابيه ياتي=ماودي اشوفه ولا اسمع بطاريه