يطول الوقت وعيون اللقا تستعجل الاشواق=على كثر الفرح تبقى رهينة شوفة الغالي
ألا وان طالت المده تطيق من الصبر ما طاق=تهد عزومها الضيقه تهدّي صوتها العالي
رمت غصن العيا واستبدلت من زاكي الاعذاق=عذق صبر الوفا واستطعمت من ريقه الحالي
نِزف جلمودها الونّه على ماضٍ نِما بفراق=تجرّع جمرة الغيبه مَعَ همٍ مهو تالي
حشا وان ضامها غمٍ تغشت غيهب الاعماق=سرى فكره تبع طيفٍ حزم في خصره الشالي
تجود وتنثر احساسه تترجم ماخفى باوراق=ولا يفهم معاناتَهْ اديبٍ من زمن بالي
ويطول الوقت وعيون اللقا ماخالفت اذواق=خلاصة فكرها ينبض بفكره ظِلها طالي
نمت واستحضرت واستعجلت في عارض الاحداق=تبيّن شِدّة اللهفه على عينٍ بها غالي

يا إله الخلق يارب البشر=ياعليمٍ في خفى الكون الضرير
كيف جرح الخل ياتي بالقهر=والمصيبه ميتٍ فيه الضمير
ماهقيت البعض لا ثار ونفر=يقلب الدنيا ويجعلك الخطير
لين جات ونشّفت عمق البحر=والبلا محدن على البلوى خشير
ليتها من قبل لا تاتي تغر=تنفجر بعيون ناقلها النذير
غيّمة بالعين وآخرة السطر=ياحسيبه بالذي عقب بيصير

الحب يتعب والتعب ساسه اجهاد=لولاه مانشقى ولا تشيّب العين
الحب مجنونٍ سرق لذ الارقاد=والتايه اللي يمّه يفل الايدين

الحمد للهْ والنوايب نوايب=والعبد دون الشكر مايكسب رضاه
فضله عظيمٍ يخلف اعتى المصايب=ويجود من جوده على العبد بعطاه
من بعدها والقلب لا شك ذايب=ساحت عروقه من عظيمات بلواه
فرقى الاخو بالجوف يودع عطايب=والجاش يبكي خافقٍ كان يرعاه
والله لو تنفع تجيبه طلايب=والا المفادى لرجعته كان فاداه
يامحمد اللي جاك حقٍ وصايب=ودربٍ على رغم المسافات تاطاه
فقدك لابو سامي يزيد اللهايب=ومثله فقيده يفقده شخص خاواه
تجزع ومن لذ الملذات طايب=ومن ضيقتك تمشي على غير مهداه
حتى بمنامك تنطق : الحظ خايب=وياكيف خيّي بالصواديف ملقاه ؟
ذابت عروقك دون هب الهبايب=والدمع لولا الكبت يذرف وينعاه
يا محمد اللي راح لا شك غايب=ولو كان به رجعه ترانا نتحراه
مار العوض ياخوك بعيال شايب=بِرٍ على رغم التقاصير يجزاه
واليا تعبت اثن القدم للنصايب=اجر وغنيمه واتّدبر بما جاه
وياجعل ابو سامي وباقي القرايب=في جنة الفردوس مسكنه باعلاه
والحمد لله والنوايب نوايب=والعبد لولا الشكر مايكسب رضاه

غفى رمش العتب وارخى على بيض الورق حَظّه=تلحّف شرهة الصادق و خاطب عين ماتسمع
ألا ياواهج الماضي دخيلك حبهم قَظّه=خلاص العمر مايسعف يقيك وجمرتك تدمع