يافر قلبي فر تسعه وسبعين=هاف على خبرك وراعيه فره
اليا كبس توحي حنين الشكامين=وصياح البساتم يوم ثالث يجره
هدير صوته مثل سيل الشعيبين=لاسال آحامر والمرا مثل كره
وزيت المكينه دهن عود السلاطين=ومي الرديتر كاس خمر تفره
لونه عذاب اللي على الكيف هاوين=دم الغزال اللون سودا نمره
ما وضبه تحسين وحمود وحسين=ولاحط بالورشه لعابث يضره
ياالعن ابو دم اليهود الفهيمين=بصنع الحديد افكارهم مستمره
راعيه ذرب وازنه بالقوانين=ومظبط اعياره على مايسره
عبا وقوده وامتلا التنك جنبين=شد البلاد مصدر من مقره
سواق تقتل وسط راسه شياطين=يسري ويصبح وسط عرعر وبره
وقت القنص يطربك هو منوة العين=ياصل معك جو عديمه قفره
وقت الربيع الورد غادي بساتين=ما ايبين الصدام غاطيه مره
حدر من امظله وفوق الوعلتين=انهاك عن هالدرب لا لا تمره
خلك مع اللي مثل حالك كسيفين=ودرب الهوى وش لك تروح وتطره
روح من الحمزه على خريص هالحين=مع زحمة الدنيا ترى العمر مره
داوم دوام البنك خل الشفيقين=راح الزمان اللي به النفس حره
عيشة مذله مثل شيخ بلا ايدين=صابر على المقسوم خيره وشره
وش لك مع اللي عن دروبك مقفين=شريط ماضينا خلص لاتكره
رح دودل الهامه ورى البنت شيرين=وعلم المراجل اتركه لاتشره
رح واترك علوم الرجال الحشيمين=دام المراجل ما اسكنت منك ذره
البس مع القبوع جنز اجنبيين=وافرق على الجنبين يالهيس غره
استار اكاديمي وحلوين زينين=وكل فرة به ول ما اقشرك فره
لا ابوك من عيشه حياة الميادين=ولا ابو التطور عيشته حيل مره
ببقا بدوي ذيب على العسر واللين=وآسامر انجوم السما والمجره
ولا ابي على اخر عمري اعيش مسكين=واموت من غيضي وبالنفس حره